Waziri wa Mambo ya Nje wa Uganda amelaani kitendo cha nchi za Magharibi kulitumia vibaya Baraza la Usalama la Umoja wa Mataifa kama wenzo wa kuishinikiza Iran, baada ya baraza hilo lenye wanachama 15 kupiga kura ya kurejesha vikwazo vya “snapback” dhidi ya Jamhuri ya Kiislamu.
Jenerali Odongo Jeje Abubakhar ametoa kauli hiyo katika mazungumzo yake ya Jumamosi mchana na Waziri wa Mambo ya Nje wa Iran Sayyid Abbas Araghchi ambaye alielekea New York kuhudhuria kikao cha kila mwaka cha Baraza Kuu la Umoja wa Mataifa.
Sambamba na kulaani hatua ya nchi za Magharibi za kulitumia vibaya Baraza la Usalama kwa maslahi yao ya kisiasa, Waziri Abubakhar amesema kuwa, Kampala inaamini kwamba nchi zote zina haki ya kufaidika kwa njia za amani na nishati ya nyuklia ikiwemo Iran.
Waziri wa Mambo ya Nje wa Uganda ametlia mkazo msimamo wa nchi yake na wa Jumuiya ya Nchi Zisizofungamana na Siasa za Upande Wowote, na kulaani hujuma za kijeshi zilizofanywa na utawala wa Kizayuni wa Israel na Marekani dhidi ya Iran mwezi Juni mwaka huu.
Katika mazungumzo hayo, pande mbili za Iran na Uganda zimejadiliana pia njia za kuzidi kustawisha uhusiano kati yao na kutafutwa njia za kushirikiana zaidi katika nyuga zote zikiwemo za kiuchumi kibiashara, teknolojia na kilimo.
Mawaziri wa Mambo ya Nje wa Iran na Uganda pia wamebadilishana mawazo kuhusu njia za kuimarisha uratibu na ushirikiano kati ya Tehran na Kampala ndani ya mashirika ya kimataifa.
Araghchi, kwa upande wake, alisisitiza umuhimu mkubwa ambao Jamhuri ya Kiislamu inauweka katika kutanua uhusiano na nchi zinazoendelea, hususan za barani Afrika, na kueleza kuwa Iran iko tayari kuimarisha ushirikiano wa pande mbili katika sekta zote.