Moto wa Utumishi Girls: Mama aangua kilio baada ya bintiye kupoteza maisha katika mkasa

• Moto wa kutisha ulizuka katika Utumishi Girls Academy huko Gilgil, kaunti ya Nakuru, na kusababisha vifo vya wanafunzi kadhaa
• Moto huo unadaiwa kuanza majira ya saa 8 usiku wa kuamkia Mei 28 katika bweni la shule wanafunzi walipokuwa wamelala, na kuwatega wengi ndani
• Mama mmoja mwenye huzuni alinasa kwenye video akibubujikwa na machozi huku akimtafuta mtoto wake kwa uchungu katikati ya janga hilo

Wakenya bado wako katika mshtuko kufuatia tukio la moto katika Utumishi Girls Academy huko Gilgil, kaunti ya Nakuru.

Wazazi walimiminika katika eneo la shule mapema Alhamisi asubuhi wakitumaini kuthibitisha usalama wa mabinti wao.

Moto huo ulizuka majira ya saa 8 usiku Alhamisi, Mei 28, katika bweni la shule wakati wanafunzi walipokuwa bado wamelala.

Angalau wanafunzi 16 kutoka shule hiyo wamethibitishwa kufariki dunia.

Mzazi wa Utumishi Girls Academy abubujika machozi

Video moja ilinasa mama mmoja aliyekuwa amehuzunika sana akilia kwa uchungu na kumuulizia binti yake. Hakuweza kuficha maumivu yake huku watazamaji na maafisa wa usalama wakijaribu kumzuia.

Pia soma

Utumishi Girls Academy Fire: Mzazi asimulia jinsi wanafunzi walijaribu kujiokoa moto ulipozuka

Alikuwa akizunguka katika eneo la shule huku akipiga mayowe na kuuliza maswali, akisema kuwa kuna haja ya kuimarisha hatua za usalama mashuleni.

Alipokuwa akitembea, polisi waliokuwepo walijaribu kumzuia, lakini wazazi na walezi waliokuwa shuleni waliwaomba wamwache awe huru.

“Hao wenye wamekufa wako wapi sahii, wazazi wa wale wenye wamekufa wako wapi sahii? Tunahitaji usalama mkali katika shule zetu kwa jina la Yesu, tuko na kilio,” alilia.

Aliendelea kutembea bila mwelekeo maalum, akionyesha jinsi moto huo ulivyomuathiri kwa kina.

Wakenya wawafariji wazazi wa Utumishi Girls waliogubikwa na huzuni

Gakenia Gakeni:

“Hatuhitaji tu maafisa wa usalama bali pia wataalamu wa afya ya akili wawe eneo la tukio… watu wanaoelewa umuhimu wa kuwaacha watu waomboleze kwa njia yao hadi watulie wenyewe kabla mtu yeyote hajaingilia. Kujaribu kuzuia namna anavyoonyesha mshtuko na maumivu hakutasaidia.”

Ricko Affelley:

“Huu ni mwamko kwa taasisi za elimu kujumuisha mafunzo ya mara kwa mara ya mwitikio wa dharura na uokoaji kwa wanafunzi. Najua ni jambo linalopuuzwa, lakini tunagundua umuhimu wake baada ya majanga kama haya kutupata.”

Mwiitu Wa Nzioki:

“Afya na usalama ni muhimu katika kila taasisi. Afya na usalama kazini vinapaswa kuchukuliwa kwa uzito. Tafadhali mwacheni ajitulize kwa kuzungumza… inauma sana.”

Pia soma

Mkasa Utumishi Girls: Baadhi ya wanafunzi walitoka nje ya shule baada ya moto kuzuka, polisi wasema

Hon. RHODA PULEI-tumah:

“Naweza kufikiria maumivu yake. MwachenI aonyeshe hisia zake kwa njia anayoona inamfaa zaidi. Sasa ninachoshangaa ni nini kilikuwa akilini mwa yule afisa wa polisi?”

Read ENGLISH VERSION

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia news@tuko.co.ke au WhatsApp: 0732482690.

Chanzo: TUKO.co.ke