Rais wa Burundi na Mwenyekiti wa sasa wa Umoja wa Afrika, Évariste Ndayishimiye, anatarajiwa leo Jumatatu, Juni 22, 2026, huko Kinshasa, mji mkuu wa Jamhuri ya Kidemokrasia ya Kongo, kwa ziara ya kikazi ya saa 48.
Imechapishwa:
Dakika 2 Wakati wa kusoma
Matangazo ya kibiashara
Kulingana na kitengo cha mawasiliano cha ofisi ya rais wa Jamhuri ya Kidemokrasia ya Kongo, ambacho kilitangaza habari hiyo siku ya Jumapili jioni, Juni 21, 2026, ziara hii ya Mwenyekiti wa sasa wa AU huko Kinshasa inafuatia mwaliko kutoka kwa mwenzake wa Kongo, Félix-Antoine Tshisekedi.
Chanzo hicho pia kilisema kwamba ziara hii ya kiserikali ya Mkuu wa Nchi wa Burundi inaonyesha kina cha uhusiano wa kihistoria unaounganisha nchi hizo mbili na raia wao, yaani Burundi na Jamhuri ya Kidemokrasia ya Kongo.
Katika tukio hili, kulingana na ofisi ya rais wa Jamhuri, Rais Félix-Antoine Tshisekedi atasafiri hadi Uwanja wa Ndege wa Kimataifa wa N’djili kumkaribisha mgeni wake rasmi. Wakuu hao wawili wa nchi watafanya mazungumzo ya faragha katika eneo la Jiji la Umoja wa Afrika, ikifuatiwa na mkutano wa pamoja na waandishi wa habari.
“Majadiliano kati ya viongozi hao wawili yatazingatia masuala ya maslahi ya pamoja, ikiwa ni pamoja na usalama mashariki mwa DRC na mwitikio wa ugonjwa wa virusi vya Ebola. Ziara hii inakuja huku Rais Ndayishimiye akishikilia urais wa kupokezana wa Umoja wa Afrika,” ilisema ofisi ya Félix Tshisekedi.
Katika eneo la Maziwa Makuu, Burundi na Jamhuri ya Kidemokrasia ya Kongo (DRC) ni washirika wa kimkakati walioungmana na makubaliano ya ulinzi ya pande mbili yaliyosainiwa mwezi Machi 2023. Kutokana na ukosefu wa usalama mashariki mwa DRCna mashambulizi ya waasi wa AFC/M23 na washirika wake Kivu Kusini, Bujumbura imetuma maelfu ya wanajeshi kusaidia jeshi la Kongo (FARDC) na kulinda mpaka wa pamoja.
Muungano huu wa kijeshi umeundwa kuzunguka maeneo kadhaa ya ushirikiano. Mawaziri wa ulinzi wa nchi zote mbili huthibitisha mara kwa mara kujitolea kwao kuimarisha ushirikiano huu wa kimkakati. Maelfu ya wanajeshi wa Burundi wamepelekwa Kivu Kusini na maeneo mengine ya mstari wa mbele ili kuisaidia jeshi la FARDC katika operesheni dhidi ya makundi yenye silaha.
Kwa hivyo mataifa hayo mawili yanashiriki changamoto za usalama zinazofanana na yanaonyesha kujitolea kwa pamoja kwa amani ya kudumu ya eneo la Maziwa Makuu.