Mkutano wa leo wa Baraza kuhusu Sudan ulikuwa ufanyike mwezi ujao wa Novemba, lakini umeitishwa mapema na kwa dharura kutokana na kuzidi kudidimia kwa hali ya usalama na kibinadamu huko El Fasher.
Hospitali, shule na kambi za wakimbizi wa ndani zinashambuliwa, huku mitaa mizima ikibaki mitupu baada ya familia kukimbia wanamgambo wa Rapid Support Forces, au RSF waliotwaa mji huo.
Bwana Fletcher akahoji, “je, vizazi vilivyotutangulia vya viongozi na wanadiplomasia vingekuwa dhoofu kiasi hiki? Ikiwa sivyo, ni nini ambacho hatufanyi ambacho tunaweza kufanya? Wanaotufuata watazungumzia kushindwa kwetu na hatua ambazo tulipaswa kuchukua: je, hatuwezi kuchukua hatua hizo sasa?”
Ahadi baada ya Vita Kuu za dunia zinatwama
Amekumbusha kuwa “tuliahidi zamani… kuviokoa vizazi vijavyo dhidi ya janga la vita, ambalo mara mbili katika maisha yetu limeleta huzuni isiyopimika kwa binadamu, na kuthibitisha tena imani katika haki za msingi za binadamu, katika heshima na thamani ya utu wa mwanadamu, katika usawa wa haki kati ya wanaume na wanawake na mataifa makubwa kwa madogo, na kuanzisha hali ambazo haki na sheria za kimataifa zinaweza kudumishwa.”
Mkuu huyo wa OCHA amesema, “ili walionusurika El Fasher waamini maneno hayo, je, hatuwezi kuchukua hatua kwa nguvu zaidi, kwa ujasiri, kwa uaminifu na kwa umoja wa madhumuni? Je, hili kweli ni gumu sana kwetu? Iko wapi diplomasia yetu? Ziko wapi thamani zetu? Uko wapi mkataba wetu? Iko wapi dhamiri yetu?”
Mambo matatu ya Fletcher
Pamoja na kuhoji uwezo na dhamira ya viongozi wa sasa, Bwana Fletcher ameomba mambo matatu kwa Baraza na nchi wanachama wa Umoja wa Mataifa
Mosi: Hatua za haraka na za kina za kukomesha ukatili dhidi ya raia sambamba na kuacha kupeleka silaha ambazo zinachochea mzozo huo. Na wanaotaka kuondoka El Fasher waruhusiwe kufanya hivyo.
Pili: Kuondolewa kwa vizuizi vyote ili misaada ya kibinadamu iweze kuingizwa El Fasher jimboni Darfur Kaskazini, halikadhalika Khartoum, Kordofan na kwingineko nchini humo
Tatu: Ufadhili kwa kuwa “tunapoelekea kuhitimisha robo ya mwisho ya mwaka asilimia 74 ya ombi la usaidizi kwa Sudan kwa mwaka 2025 bado halijatimizwa.Matokeo yake mgao wa chakula unapunguzwa kwa asilimia 50.”
Hakuna aliye salama El Fasher – DPPA
Mapema Afisa kutoka Idara ya Umoja wa Mataifa inayohusika na Masuala ya Kisiasa, Ujenzi wa Amani na Operesheni za Amani, DPPA, Martha Ama Akyaa Pobee alihutubia wajumbe wa Baraza na kusema, kuwa, “licha ya ahadi za kulinda raia, ukweli ni kwamba hakuna mtu aliye salama huko El Fasher.”
Bi, Pobee ambaye anaongoza kitengo cha Afrika amesema “baada ya zaidi ya siku 500 chini ya mzingiro, jiji la El Fasher huko Kaskazini mwa Darfur lilitekwa na Vikosi vya Usaidizi wa Haraka (RSF), hatua ambayo “inaashiria mabadiliko makubwa katika mienendo ya usalama.”
Mapigano pia yameongezeka katika eneo la Kordofan — ambalo huenda likawa uwanja unaofuata wa mashambulizi ya kijeshi kwa pande zinazopigana — na mashambulizi ya ndege zisizo na rubani dhidi ya malengo mapya katika majimbo mengine yanaonyesha kuwa wigo wa mzozo huu unazidi kupanuka.
“Gharama ya kibinadamu ni kubwa sana,” amesema, akitaja taarifa kuhusu ukatili unaolenga makabila fulani, viwango vya juu vya ukatili wa kingono, mauaji ya halaiki na misako ya nyumba kwa nyumba.
“Pande husika lazima zirudi mezani kwa mazungumzo kwa nia njema,” amesisitiza, kwani hiyo ndio “njia pekee ya kuzuia Sudan kuendelea kutumbukia katika mgawanyiko wa kivitendo.”
Ni kwa mantiki hiyo amesihi nchi wanachama zenye ushawishi kwa pande husika ambazo ni RSF na jeshi la serikali ya Sudan, kuwatia moyo ili wachukue hatua hiyo muhimu.