Jukwaa hili jipya lijulikanalo kama WMO Weather, Climate and Water Intelligence Commons (“WMO Commons”) lilianzishwa katika jukwaa la wawekezaji lililowaleta pamoja wadau kutoka sekta ya umma na binafsi, mabenki ya maendeleo na binafsi, wafadhili, na mashirika ya kibinadamu. Mpango huu umezinduliwa rasmi mwaka 2026.
“WMO Commons si mfuko wa kifedha wa kawaida. Ni uwekezaji katika uendelevu na uaminifu unaounganisha rasilimali za umma, wafadhili, na sekta binafsi ili kuhakikisha kuwa data inapatikana kwa uhuru, mifumo inabaki kuunganishwa, na ubunifu unawafikia wale wanaouhitaji zaidi,” amesema Katibu Mkuu wa WMO, Celeste Saulo.
Celeste Saulo ameeleza kwenye jukwaa hilo mjini Geneva kuwa leo , mabadiliko makubwa ya hali ya hewa yanaongezeka kwa kasi kuliko uwezo wetu wa kuyadhibiti. Mwaka 2024 pekee, hasara za dunia zinazohusiana na hali ya hewa zilifikia dola bilioni 318 ,nusu yake ikiwa haikuhakikishwa. Lakini kwa kila dola moja inayowekezwa katika tahadhari za mapema na taarifa bunifu za hali ya hewa, tunaokoa hadi dola kumi na tano. Mantiki ni rahisi: uimara una faida.
Celeste Saulo amesisitiza kuwa wajibu wa WMO si misaada ni usimamizi wa hatari kwa kiwango cha sayari. Ni msingi ambao fedha endelevu, minyororo imara ya usambazaji, na jamii thabiti zinategemea.