Wengi bado wanaikumbatia teknolojia ya akili mnemba na mabilioni yamewekezwa kwenye sekta hiyo ukizingatia miundo mbinu, kampuni mpya na wataalam walio na ujuzi na uwezo mkubwa wa kazi.
Kampuni mama ya ChatGPT ya Open AI, Softbank na Oracle zilitangaza ahadi ya kuwekeza dola bilioni 500 za Marekani kwenye utengenezaji wa kompyuta za kisasa zinazotumia akili mnemba.
Open AI na kampuni kubwa ya kutengeneza vifaa vya kuhifadhia habari ya Nvidia ilitangaza kutenga hazina ya dola bilioni 100 ili kuhifadhi nafasi na ushawishi wake Marekani, nayo kampuni kubwa ya teknolojia ya China ya Alibaba na Tencent ziliongeza viwango vya uwekezaji wao ili kusogeza mbele na kuiongeza kasi ya kutimiza malengo ya China ya kuwa kiongozi katika sekta ya akili mnemba ifikapo mwaka 2030.
Tangu ChatGPT kuingia kwenye soko mwezi Novemba mwaka 2022, hisa zilizo na mafungamano na akili mnemba zimeongezeka thamani yake kwa dola trilioni 17.5 kwa mujibu wa duru za Bloomberg, na kuwakilisha asilimia 75 ya faida ya faharisi ya soko la hisa hali inayozisukuma kampuni kama Nvidia na Microsoft kuvunja rekodi ya thamani yake.
Hata hivyo ishara za uchovu zimedhihirika. Baadhi ya kampuni zinapunguza matumizi yake ya teknolojia ya akili mnemba,bajeti zinabanwa na shauku ya kutaka kujifunza lugha hiyo ya teknolojia imekipita kiwango cha faida zake.
Kulingana na Carl-Benedikt Frey, profesa wa akili mnemba na kazi katika chuo kikuu cha Oxford nchini Uingereza aliyezungumza na DW, miundo mbinu ya akili mnemba ni kama kamari na aghalabu inaaminika kuwa matumizi yake yataongezeka ilhali tathmini kadhaa za Marekani zinaashiria kuwa mapokezi yake yamepungua tangu majira ya joto kuanza.
Sekta ya akili Mnemba kwenda mrama?
Mtaalam huyo anafafanua kuwa iwapo hakutakuwa na mabadiliko mapya ya kudumu,sekta ya akili mnemba itakwenda mrama.
Tathmini ya idara ya takwimu ya Marekani, inayofuatilia kampuni milioni 1.2 kila baada ya wiki mbili, imebaini kuwa matumizi ya teknolojia ya akili mnemba katika kampuni zilizo na wafanyakazi zaidi ya 250 yamepungua kwa kiasi ya asilimia 14 kati ya mwezi wa Juni na kufikia kiasi ya asilimia 12 mwezi wa Agosti.
Changamoto kubwa ya teknolojia ya akili mnemba ni kwamba ina uwezo wa kutoa dhana na wala sio maelezo ya kuaminika.
Mapungufu mengine ni kutoweza kutegemewa kikamilifu na utendaji ambao aghalabu baadhi ya wakati unashindwa kutimiza wajibu wake kwani hauendani na wakati.
Tofauti iliyopo kati ya matarajio na uhalisia wa matumizi yake imewawia wawekezaji kusitisha kasi yao ya kuikumbatia akili mnemba.
Kimsingi wawekezaji wameingia uoga fulani iwapo teknolojia hiyo itadumu kwani haitumiki kwa kazi ambazo zinachangia katika kuzalisha thamani.