Lakini zaidi ya idadi, ujumbe uliojitokeza ni ule wa uwajibikaji, kasi na nafasi ya upinzani katika serikali ijayo.
Tangazo la Baraza jipya la Mawaziri lililotolewa leo Ikulu ya Zanzibar limeashiria mwanzo wa awamu mpya ya uongozi chini ya Rais Mwinyi.
Katika tangazo hilo, Rais Mwinyi ameongeza wizara mbili, na ameachia wazi nafasi nne kwa ajili ya chama cha upinzani cha ACT-Wazalendo ili kuendeleza dhamira ya Serikali ya Umoja wa Kitaifa kwa mujibu wa Katiba ya Zanzibar
Chama cha ACT-Wazalendo kimetakiwa kuamua ndani ya siku 90 kama kitaingia serikalini au la.
Uamuzi huo unaweza kuwa kipimo cha namna siasa za Zanzibar zitakavyoelekea baada ya uchaguzi wa mwaka huu.
”Nafasi zao katika Baraza hili la Mawaziri ni nafasi nne. Nimeamua kuziacha wazi bila ya uteuzi nafasi hizo mpaka pale tutakapokubaliana aidha wanaingia kwenye Serikali ya Umoja wa Kitaifa au laa.”
Rais Mwinyi aliongeza kwamba “nipo tayari kushirikiana nao kuunda Serikali ya Umoja wa Kitaifa na hapa ninatumia mamlaka yangu ya kikatiba kwamba hizi nafasi zitabaki wazi mpaka muda uliowekwa kikatiba utakapokwisha, ambao ni siku 60.”
Katika orodha ya walioteuliwa, wizara nyeti kama Fedha na Mipango sasa itaongozwa na Dokta Juma Maliki Akil, aliyekuwa Katibu Mkuu wa wizara hiyo katika awamu iliyopita, uteuzi unaoonyesha mwendelezo na uzoefu katika kusimamia uchumi wa Zanzibar.
Idrisa Kitwana Mustafa, aliyekuwa Mkuu wa Mkoa wa Mjini Magharibi, sasa ataongoza Wizara ya Tawala za Mikoa na Vikosi Maalum moja ya wizara zenye ushawishi mkubwa katika muundo wa utawala wa Zanzibar.
Baadhi ya Mawaziri katika serikali iliyopita wapigwa chini
Baadhi ya mawaziri wa awamu iliyopita hawakurejeshwa, akiwemo aliyekuwa Waziri wa Habari Tabia Maulid Mwita na Waziri wa Ikulu Ali Suleiman Ameir.
Badala yake, nafasi zao zimechukuliwa na sura mpya na vijana, hatua ambayo wachambuzi wa siasa wanaiona kama mkakati wa Rais Mwinyi kuimarisha ufanisi na kuandaa viongozi wapya wa baadaye.
Katika mazungumzo yake, Rais Mwinyi amesema wazi kuwa serikali yake ya awamu ya pili itakuwa na kasi zaidi, huku akisisitiza uwajibikaji wa mawaziri wake.
“Kasi ya awamu ya kwanza na kasi ya awamu ya pili lazima ziwe tofauti hatuwezi kwenda vile vile, lazima twende na kasi kubwa.
Alisisitiza juu ya uwajibikaji, utu na weledi kwa watumishi wa umma akisema hatakuwa na simile kwa yeyote mwenye kwenda kinyume.
“Nina miaka mitano Mwenyeenzi Mungu akiniweka hai wale ambao hawatowajibika sidhani kama watakuwa na nafasi na watu wengi wamenishauri ongeza ukali kidogo.”
Kauli hii inaweka wazi kwamba viongozi wanaoteuliwa wanatakiwa kuendana na dira ya ”utendaji kwa matokeo,” ambayo imekuwa kaulimbiu ya utawala wa Rais Mwinyi tangu mwaka 2020.
Hata hivyo, macho yote sasa yapo kwa chama cha ACT-Wazalendo kama watakubali kushiriki katika serikali hii au watachagua kubaki nje na kuendelea na siasa za upinzani wakiwa nje ya Serikali ya Umoja wa Kitaifa uamuzi ambao utakuwa na uzito mkubwa katika sura ya kisiasa ya Zanzibar katika miaka mitano ijayo.