Kwa mujibu wa utafiti uliofanywa na kituo cha televisheni cha ARD na kuchapishwa Alhamisi, asilimia 40 ya Wajerumani wanaamini vyama vingine vinapaswa kukataa kabisa kushirikiana na AfD.
Wakati huo huo, asilimia 25 wanasema ushirikiano unapaswa kuruhusiwa, huku asilimia 30 wakitaka maamuzi hayo yafanywe kulingana na hali husika.
Wafuasi wa vyama vya mrengo wa kushoto kwa kiasi kikubwa wanapinga ushirikiano na AfD, ilhali wafuasi wa chama hicho kinachopinga uhamiaji wanaunga mkono kwa wingi ushirikiano na vyama vingine.
Kwa upande wa wafuasi wa muungano wa kihafidhina wa Kansela Friedrich Merz, maoni yamegawanyika, asilimia 46 wanapendelea ushirikiano kwa kuangalia hali, asilimia 41 wanaupinga kabisa ushirikiano, na asilimia 10 wanaounga mkono ushirikiano kwa misingi ya kanuni.
Utafiti huo ulihusisha takribani wapiga kura 1,300, uliofanyika kati ya Novemba 3 na 5, ambapo mbali na maswali mengine washiriki pia waliulizwa kuhusu sababu za kuongezeka kwa umaarufu wa AfD.
Umaarufu wa AFD ndani ya siasa za Ujerumani
Baada ya chama hicho kupata kura za kihistoria za asilimia 20 katika uchaguzi wa Februari na kuibuka cha pili nyuma ya muungano wa kihafidhina wa Merz, AfD imeendelea kushikilia karibu asilimia 25 katika tafiti za maoni za hivi karibuni.
Sababu iliyopewa uzito zaidi na washiriki ni “kuchoshwa na sera za vyama vingine,” ikitajwa na asilimia 60 ya waliohojiwa, wakiwemo asilimia 39 ya wafuasi wa AfD.
Kwa miaka kadhaa, chama hicho kimekuwa kikifuatiliwa na idara ya ujasusi wa ndani ya Ujerumani kwa tuhuma za kufanya shughuli zinazokiuka katiba.
Mwezi Mei, mamlaka hiyo ilikikadiria rasmi kama chama cha “siasa kali” za mrengo wa kulia, ingawa matumizi ya hadhi hiyo ambayo yangeruhusu ufuatiliaji zaidi wa kisheria yalisitishwa kwa muda baada ya AfD kufungua kesi mahakamani.