Shambulizi la Urusi la usiku wa kuamkia leo zaidi likiulenga mji mkuu wa Kiev, limewaua watu wanne na kuharibu majengo kote mjini humo, kulingana na mamlaka za Ukraine. Rais Volodmyr Zelensky amesema “hilo lilikuwa shambulio lililopangwa kwa makusudi lililolenga kusababisha madhara makubwa kwa watu na miundombinu ya kiraia.” Ameongeza kuwa Urusi imerusha droni zipatazo 430 na makombora 18.
Huduma ya dharura ya Ukraine imewaokoa dazeni ya watu kutoka katika majengo yaliyoshika moto na kuharibiwa katika shambulizi hilo wakati polisi wakisema nyumba zipatazo 30 za maakazi ya watu zimeharibiwa katika wilaya tisa.
Kwa upande mwingine pia, Ukraine nayo imefanya shambulizi la droni mapema leo ijumaa na kuharibu meli iliyokuwa imetia nang’a, majengo ya makaazi na ghala la mafuta katika mji wa bandari nyeusi wa Urusi wa Novorossiysk na kuwajeruhi wafanyakazi watatu. Bandari hiyo ni njia muhimu kwa usafirishaji wa mafuta ya Urusi. Bei za mafuta duniani zimepanda kwa asilimia 2 kutokana hofu ya usambazaji baada ya shambulio hilo.
Miundombinu ya mafuta ya Urusi imetatizika mara kwa mara mwaka huu kutokana na mashambulizi ya droni na boti. Bandari zilizoko katika bandari za Baltiki na bahari nyeusi pamoja na mfumo wa bomba kuu na vinu vya kusafisha mafuta vimekuwa vikilengwa.
Msemaji wa Ikulu ya Kremlin Dmitry Peskov akizungumza na waandishi wa habari jana alisema Urusi bado inataka amani. “Urusi inataka amani. Urusi iko tayari kusuluhisha suala la Ukraine kupitia njia za kisiasa na kidiplomasia. Lakini kukosekana kwa fursa kama hiyo, huku serikali ya Kiev ikifunga mlango wake, tutaendelea na operesheni maalum ya kijeshi. Kipaumbele chetu kikuu ni kuhakikisha masilahi yetu, usalama kwa vizazi vijavyo na kutimiza majukumu yaliyo mbele yetu.”
Mashambulizi hayo ya pande mbiliyanafanyika wakati washirika wa Magharibi wakizidisha shinikizo dhidi ya Urusi. Hapo siku ya Jumatano, Canada ilizindua vikwazo vipya vinavyolenga utengenezaji wa droni na uzalishaji mafuta wa Urusi, sambamba na miundombinu inayotumika kuanzisha mashambulizi ya kimtandao.
Aidha pia mawaziri wa mambo ya kigeni wa kundi la nchi saba zilizopiga hatua kiviwanda walitaka usitishaji mara moja wa mapigano Ukraine, wakielezea msaada usioyumba wa ulinzi wa eneo hilo.
Na wakati huo pia Tume ya Umoja wa Ulaya inakusudia kutumia sehemu ya mali za Urusi zilizofungiwa ili kuweza kuikopesha Kiev kwa ajili ya bajeti yake na msaada wa kijeshi kwa kipindi cha miaka miwili ijayo.
Takriban miaka minne sasa ya vita, Moscow imekataa wito wa kusitisha mapigano na juhudi za Rais wa Marekani Donald Trump kufufua mkataba wa amani uliokwama kwa muda mrefu.
Wataalam wanasema mashambulizi ya hivi karibuni ya Urusi dhidi ya miundombinu ya nishati, yanaiweka Ukraine katika hatari ya kukatika kwa umeme wakati ikiingia katika msimu wa majira ya baridi.