Akihojiwa mjini Abuja, Waziri wa mambo ya nje wa Nigeria Yusuf Tuggar ameliambia shirika la habari la AFP kuwa mazungumzo yao na Marekani yanahusu namna nchi hizo mbili zinavyoweza kushirikiana ili kukabiliana na changamoto zilizopo za kiusalama na hii ikiwa ni kwa manufaa ya ulimwengu mzima.
Mwishoni mwa mwezi uliopita, Trump alisema kuwa wizara yake ya Mambo ya Nje itaiweka Nigeria kwenye orodha ya nchi zenye hali tata kutokana na vitendo vya ukiukaji wa uhuru kuabudu baada ya kuripotiwa mauaji ya Wakristo yaliyokuwa yakiendeshwa na waislamu wenye msimamo mkali. Baadaye Trump alienda mbali zaidi na kutishia kuingilia kati kijeshi huko Nigeria.
Mwanzoni mwa mwezi huu wa Novemba, Trump aliiamuru wizara yake ya ulinzi kupanga uwezekano wa mkakati wa shambulio katika taifa hilo lenye watu wengi zaidi barani Afrika kwa kile alichotaja kuwa “Waislam wenye msimamo mkali wanawaua Wakristo kwa idadi kubwa sana”, huku akionya kuwa ikiwa Nigeria haitochukua hatua ya kusitisha mauaji hayo, basi Marekani ingeliingilia kati kwa kufanya shambulio la haraka na lenye ufanisi mkubwa.
Hata hivyo Waziri Tuggar amesema haamini kuwa Washington itaishambulia Nigeria kijeshi kwa kuwa mazungumzo kati ya nchi hizo mbili yanaendelea na yamefikia katika hatua ya kuridhisha.
Mgogoro wa muda mrefu na usiochagua dini
Nigeria, yenye wakazi milioni 230, imegawanywa kwa usawa kati ya kusini mwa nchi kwenye Wakristo wengi huku Waislamu walio wengi wakiishi kaskazini mwa nchi.
Kumekuwa kukishuhudiwa migogoro kadhaa kati ya Wakristo na Waislamu, ikiwa ni pamoja na uasi wa makundi ya itikadi kali ambayo mara nyingi bila kubagua huwaua Wakristo na hata Waislamu kama alivyoeleza Idris Ishaq imamu huko Nigeria:
“Kuna Waislamu na wasio Waislamu wanaohusika kwa sababu, kama msemo unavyosema, ‘vita haviwezi kuuangamiza mji bila msaada wa mtu wa ndani.’ Baadhi ya wale wanaoshutumiwa ni Waislamu, na wengine si Waislamu. Huo ndio ukweli.”
Hayo yakiarifiwa, hali ya usalama bado ni tete huko Nigeria ambapo jana, waasi wa itikadi kali wa ISWAP wenye mafungamano na kundi la kigaidi linalojiita Dola la Kiislamu IS walitangaza kumuua jenerali M.Uba wa jeshi la Nigeria aliyekuwa akiongoza mapambano dhidi yao katika eneo tete la Ziwa Chad.
Wakati huohuo, kundi la watu wenye silaha limewateka nyara wanafunzi wapatao 25 katika shule ya sekondari ya Kebbi huko kaskazini-Magharibi mwa Nigeria na kumuua naibu kiongozi wa shule hiyo na kumjeruhi mlinzi. Polisi wamesema majambazi hao walikuwa na silaha nzito na hadi sasa haijulikani walikoelekea.
Katika miaka ya hivi karibuni, eneo hilo limekuwa likishuhudia mara kwa mara vitendo vya utekaji nyara mashuleni ambapo baadaye magenge yenye silaha hudai kikomboleo ili kuwaachilia huru wanafunzi waliotekwa.
AFP/DW