Madai hayo ya Trump yanatokana na shinikizo kutoka kwa baadhi ya wanasiasa wa Marekani kama Seneta Ted Cruz na watu mashuhuri waliodai, bila ushahidi, kuwa kuna mauaji ya Wakristo yanayoendelea nchini Nigeria. Hata hivyo, uchunguzi wa shirika la habari la Associated Press umebaini kuwa, waathirika wa migogoro ya usalama nchini humo ni wa dini zote.
Trump, pia alitangaza kuiweka Nigeria kwenye orodha ya nchi zinazokiuka uhuru wa kidini, hatua ambayo imepingwa vikali na serikali ya Nigeria. Baada ya ujumbe huo Msemaji wa Rais wa Nigeria Daniel Bwala amesema madai hayo yanategemea ripoti za zamani, hasa wakati kundi la Boko Haram lilipoanzisha uasi wa kutekeleza tafsiri kali ya sheria ya Kiislamu.
Cyril Abaku, ni Mtangazaji na mchambuzi wa siasa kutoka Nigeria amesema kuwa madai hayo ni vyema uwazi ukawepo kwenye suala hili ili Marekani iweze kuelewa.
“Madai na tuhuma za kuingilia mambo ya ndani ya nchi yanaweza kuwepo, lakini swali la msingi ni: tunafaidika nini? Tunajua kuna vita Ukraine, na mauaji huko Gaza, bila shaka. Lakini kwa sisi Wanaigeria, yanayotokea hapa nchini ndiyo yanatugusa moja kwa moja. Mauaji yamefikia kiwango cha kutokuvumilika. Kwa hiyo, ninachoona ni kwamba tunapaswa kufikiria, ikiwa Marekani imeonyesha nia, ni vipi sisi kama wananchi na serikali tunaweza kushirikiana.”
Nigeria yadaiwa kushindwa kuchukua hatua dhidi ya makundi ya silaha
Viongozi wa kidini nchini Nigeria pia wamepinga madai ya mateso ya Wakristo.
Joseph Hayab, aliyewahi kuwa mwenyekiti wa Chama cha Wakristo Nigeria (CAN) katika jimbo la Kaduna, amesema hakuna ushahidi wa mateso hayo, ingawa amekiri kuwa serikali inapaswa kuongeza juhudi za kulinda maisha ya raia katika maeneo yenye migogoro.
Nigeria imekuwa ikikumbwa na changamoto ya kiusalama
Wachambuzi wa masuala ya usalama wanasema ingawa madai ya mateso ya Wakristo hayana msingi thabiti, serikali ya Nigeria imeshindwa kuchukua hatua madhubuti dhidi ya makundi yenye silaha.
Cheta Nwanze kutoka taasisi ya SBM Intelligence, amesema hali ya kutowajibika kwa wahalifu inaonyesha udhaifu mkubwa wa dola.
Kwa miaka mingi, Nigeria imekumbwa na changamoto za kiusalama, hasa kaskazini mwa nchi, ambapo mashambulizi hufanywa na Boko Haram na magenge yenye silaha. Mtafiti Taiwo Hassan Adebayo amesema migogoro hiyo ni tata na haiwezi kufafanuliwa kwa misingi ya kidini pekee, kwani waathirika hutegemea zaidi jiografia ya machafuko.