Jumuiya ya Wakristo ya Nigeria (CAN) imetangaza kuwa, jumla ya wanafunzi 303 na walimu 12 wametekwa nyara na watu wenye silaha wasiojulikana siku likiwa ni tukio la pili kubwa kutokea ndani ya wiki moja, huku hofu za usalama zikiongezeka katika nchi hiyo yenye watu wengi zaidi barani Afrika
Kwa mujibu wa CAN, hiyo ni idadi mpya ambayo imebainika “baada ya zoezi la uhakiki” kufuatia utekaji nyara mkubwa uliofanywa siku ya Ijumaa, na kwamba “jumla ya wahanga waliotekwa nyara … sasa ni wanafunzi 303 na walimu 12”.
Imeelezwa kwamba, idadi ya wanafunzi waliotekwa nyara katika skuli hiyo ni karibu nusu ya wanafunzi 629 waliosajiliwa.
Taarifa ambayo katibu wa serikali ya Jimbo la Niger aliitoa siku ya Ijumaa ilisema, mamlaka husika, awali zilipokea indhari ya kiintelijensia ya kuongezeka matishio ya kiusalama katika eneo hilo. Taarifa hiyo iliendelea kueleza kwamba, skuli hiyo ilifunguliwa tena “bila kupokea taarifa au kupata hakikisho kutoka Serikali ya Jimbo, na hivyo kuwaweka wanafunzi na wafanyakazi katika hatari ambayo ingeliweza kuepukika”.
Jumatatu wiki hii, washambuliaji waliobeba silaha waliwateka nyara wasichana 25 wa shule ya sekondari katika Jimbo jirani la Kebbi, tukio lililozidisha hofu kuhusu kuongezeka ukosefu wa usalama na mashambulizi yanayolenga taasisi za elimu kaskazini mwa Nigeria.
Hadi sasa hakuna kundi lililodai kuhusika na matukio haya mawili.
Wachambuzi wa masuala ya usalama na wakazi wa eneo hilo wamefananisha utekaji huo wa Jimbo la Niger na ule maarufu wa Chibok mwaka 2014, wakati wasichana karibu 300 walipotekwa na wanamgambo wa kundi la kigaidi la Boko Haram katika Jimbo la Borno.
Wakati huohuo, mamlaka katika majimbo jirani ya Katsina na Plateau zimeagiza skui zote zifungwe kama hatua ya tahadhari.
Serikali ya shirikisho ya Nigeria imechukua hatua ya kufunga skuli nyingi na Rais Bola Tinubu alibatilisha shughuli za kimataifa, ikiwemo kuhudhuria mkutano wa kilele wa viongozi wa nchi wanachama wa G20 uliofanyika mjini Johannesburg, Afrika Kusini na kumtuma makamu wake Kashim Shettima ili yeye mwenyewe aweze kushughulikia mgogoro huo…/