Nchemba amewataka vijana kuwa macho na wale wanaosababisha chokochoko za kutaka kuhatarisha amani ya nchi na ameahidi kurejesha mambo katika mstari.
Ikiwa hotuba yake ya kwanza akiwa jimboni kwake, mkoani Sindiga Waziri Mkuu Mwigulu Nchemba ameonya kuhusu kuwepo, kile alichokiita ”wajanja wachache” wanaojaribu kuhamasisha uvunjifu wa amani ya nchi akisema mambo yakiharibika watakaoingia majaribuni ni watanzania wenyewe.
Alikumbusha juu ya umuhimu wa kutunza rasilimali za nchi ambazo alisema zinagharimiwa na Watanzania na kwamba hasira ya kuziharibu kama vile barabara hasara yake ya kuirejesha ni kubwa.
Hivi karibuni wakati wa maandamano ya Oktoba 29 wakati na baada ya uchaguzi kuliripotiwa kuwepo kwa uharibifu mkubwa wa mali za umma na za watu binafsi ikiwamo kuharibiwa miundombinu ya usafiri wa mabasi ya mwendo kasi. Usafiri huo hivi sasa umesitishwa baadhi ya maeneo.
Waziri Mkuu aliwakumbusha wananchi kuwa macho na wale wanaoeneza ushawishi wa kuchochea machafuko akisema wengi wao hawaitakii mema nchi. Aliahaidi kuyatafutiwa ufumbuzi baadhi ya masuala ikiwamo yale yanayohusiana na vyama vya siasa.
Nchemba akutana na Baraza la TEC
Kauli ya Waziri Mkuu ameitoa ikiwa imepita siku moja baada ya kukutana na kufanya mazungumzo Katibu Mkuu wa Baraza la Maaskofu Katoliki (TEC) Padre Charles Kitima, mazungumzo ambayo hata hivyo hayakufahamika hadharani mara moja
DW ilijaribu kuwasiliana na Padre Kitima kupata maoni yake juu ya mazungumzo aliyofanya na Waziri mkuu Mwigulu, juhudi hizo hazikuzaa matunda.
Viongozi hao wawili wamekutana ikiwa zimepita siku tano baada ya Baraza la Maaskofu Katoliki (TEC) kutoa kile ilichokiita TAFAKURI ya maaskofu kuhusu yale yalijitokeza wakati wa uchaguzi mkuu na baada ya uchaguzi wenyewe.
Akisoma tafakuri hiyo, Rais wa TEC Askofu Wolfgang Pisa, alisema kanisa linalaani matumizi makubwa ya vyombo vya dola kudhibiti maandamano ya raia na kutaka uwajibikaji juu ya matukio yote.
Wakati huu kunaendelea kushuhudiwa miito kutoka kwa wanasheria na watetezi wa haki za binadamu wanataka kuachiliwa mara moja mamia ya watuhumiwa, wengi wao wakiwa vijana wanaokabiliwa na kesi za uhaini katika maeneo mbalimbali ya nchi.