Kulingana na Chama cha Kikristo cha Nigeria, idadi hiyo imeongezeka kutoka 227 iliyotajwa Ijumaa baada ya uhakiki kufanyika.
Wanafunzi waliotekwa wapo kati ya umri wa miaka 8 na 18. Idadi jumla ya wanafunzi katika shule hiyo ni 629 hii ikimaanisha nusu ya wanafunzi wametekwa hali inayowapa hofu raia wa taifa hilo la Afrika kama anavyosimulia Joseph Eze.
“Serikali inajua kinachoendelea. Sijui ni kwa nini tuna jeshi lenye ndege za kivita?Wanapaswa kuwatafuta kwa haraka popote pale walipo. Lakini hawawezi kufanya chochote kwa sababu watoto wao hawapo Nigeria, wanasomea nje ya nchi. Kwa hivyo, watu wasiokuwa na uwezo wa kuwapeleka watoto wao nje ndio wanaopaswa kufa. Lazima tuiwajibishe serikali kwa kile kinachoendelea. Hatuna serikali nzuri.”
Mamlaka zimesema vikosi maalumu vimeshaanza kufanya msako wa kujaribu kuwaokoa wanafunzi hao lakini haijataja idadi kamili ya waliotekwa.
Hili ni tukio la pili la aina hiyo ndani ya wiki moja baada ya wanafunzi wengine 25 kutekwa nyara katika jimbo la Kebbi.
Serikali ya jimbo la Niger imetangaza kuzifunga shule nyingi huku Rais Bola Tinubu akifuta shughuli zake za kimataifa ikiwemo ya kuhudhuria mkutano wa G20 nchini Afrika Kusini ili kulishughulikia suala hilo. Hadi sasa hakuna kundi lolote la wanamgambo lililotangaza kuhusika na utekaji huo.