Touhid Hossain, anayeshikilia nafasi ya waziri wa mambo ya nje katika serikali ya mpito Bangladesh, alisema siku ya Ijumaa kwamba, walituma barua kwa utawala wa India kumtaka Hasina arejeshwe nyumbani. Hakueleza zaidi kilichokuwa ndani ya barua hiyo lakini kulingana na gazeti la Bengali, hiyo ilikuwa barua ya tatu kuandikiwa India tangu Hasina alipoikimbia nchi.
Baada ya Mahakama kumkuta Hasina na hatia ya uhalifu dhidi ya ubinadamu, na kutoa hukumu ya kifo dhidi yake, wizara ya mambo ya nje ilisema India inawajibu wa kumrejesha Hasina, chini ya makubaliano ya kuwarejesha nyumbani watu waliohukumiwa nchini mwao wakati wakiwa uhamishoni.
India kwa upande wake ilisema imeitambua hukumu hiyo lakini haikusema chochote kuhusu kumkabidhi Hasina kwa serikali ya Dhaka. Na hadi sasa pia haijajibu barua ya ombi hilo iliyotumwa huko wiki iliyopita.
Hasina amekuwa uhamishoni India tangu alipoondolewa madarakani
Hasina aliye na miaka 78 alihukumiwa kifo, baada ya mahakama kumkuta na hatia ya kuamuru kuandamwa kwa waandamanaji vijana waliokuwa wanadai mabadiliko nchini humo. Hasina amekuwa uhamishoni nchini India tangu utawala wake wa kimabavu ulipoondolewa mwezi Agosti mwaka 2024. Kama Waziri mkuu alikuwa anaungwa mkono na India na tangu kuondolewa kwa utawala wake mahusiano kati ya India na utawala uliopo sasa sio mazuri.
Lakini hali hiyo imeonekana kuimarika baada ya mshauri wa usalama wa kitaifa wa Bangladesh Khalilur Rahman kufanya ziara fupi nchini India kuhudhuria mkutano wa kilele wa kikanda kuhusu usalama na kukutana na mwenzake wa India Ajit Doval.
Bangladesh imekuwa katika msukosuko wa kisiasa tangu kumalizika utawala wa Sheikh Hasina huku vurugu zikishuhudiwa wakati wa kampeni ya uchaguzi unaotarajiwa kufanyika mwezi Februari 2026. Umoja wa Mataifa ulisema idadi ya waliouawa Bangladesh kufuatia vurugu za maandamano ilifikia 1,400.