Mafuriko hayo yamepelekea mitaa kuzama, nyumba kufunikwa na maji na karibu watu 34 kufariki dunia.
Hapo Jumanne, serikali ya Thailand ilitangaza hali ya dharura katika mkoa wa Songkhla, huku mvua kubwa zikinyesha katika mikoa kadhaa ya kusini mwa nchi hiyo tangu wiki iliyopita.
Picha iliyochapishwa na shirika la habari la AFP Jumatano imeonesha maji machafu yakiwa yamejaa mitaani na gorofa za chini za majengo ya makaazi, katika eneo la kitalii la Hat Yai.
Mkaazi mmoja wa mji huo ameliambia shirika la habari la Thailand kuwa eneo lote la chini la nyumba yake limefurika, huku maji yakifika kimo cha hadi angalau mita tatu na nusu.
“Nilipanda kwenye paa la nyumba ili niite mtu nimwambie atuletee chakula,” alisema mkaazi huyo Yanyong.
Msemaji wa serikali ya Thailand Siripong Angkasakulkiat aliwaambia waandishi wa habari kuwa watu 33 wamefariki dunia katika mikoa saba. Vifo hivyo vimejumuisha waliofariki kutokana na kuzama na kupigwa na umeme.
Kulingana na idara ya kuzuia na kukabiliana na majanga ya Thailand, mafuriko hayo yameenea katika mikoa saba ya kusini mwa nchi hiyo, eneo ambalo ni makao ya mamilioni ya watu.