Akizungumza na vyombo vya Habari leo, Naibu Katibu Mkuu wa Chadema, Bara, Amani Golugwa, amesema kitendo cha Waziri Mkuu, Nchemba kusema kuwa chama hicho cha upinzani, Tanzania kilisusia uchaguzi na kutaka mabadiliko ya Katiba miezi mitatu kabla ya uchaguzi ni propaganda.
Na badala yake, Amani Golugwa amesema, serikali iwasikilize wananchi na kusimamia mchakato wa Katiba mpya utakaofanikisha chaguzi huru na za haki badala ya kuzipaka mafuta sheria chache zionekane kuwa zinazofaa.
“Tulikuwa na matatizo kwenye mifumo ya uchaguzi na majibu yake tulitengeneza kwamba ili tuwe na uchaguzi huru, tunahitaji kwenda kwenye sheria hapa na kwenye Katiba hapa, kwa muda mrefu wa kutosha, kwa hiyo Mwigulu anachosema ni propaganda tu,ya kuonyesha kwamba…. ipi kwenye rekodi gani ambayo sisi tumewahi kusema reforms (mageuzi) hii tumekubali?”, alihoji Golugwa.
Akizungumza na wanahabari Novemba 25, Waziri Mkuu Mwigulu Nchemba alisema baadhi ya wanasiasa walitaka mabadiliko ya Katiba yafanyike miezi mitatu kabla ya uchaguzi na kusema kuwa hilo ni jambo gumu kutekelezeka ingawa serikali inaendelea na mchakato huo.
“Mambo ya katiba, wapi waliwajhi kuandika Katiba miezi mitatu na waende kwenye uchaguzi, hata ilependekezo tulipambana karibu miaka mitano na hatukuipta, miezi mitatu unapata Katiba gani”, alisema Nchemba.
“Mwigulu amekwepa ukweli, amepindua ukweli”
Goluwa amesema Chadema wameanza kudai mabadiliko miaka miwili iliyopita na hivyo anachokisema Waziri Mkuu huyo, ni propaganda za kisiasa.
Pamoja na mambo mengine, Chadema wamehoji kwa nini Waziri Mkuu ameficha takwimu za watu waliopoteza maisha wakati wa vurugu za Oktoba 29, ni dalili za wazi kuwa serikali inaficha ukweli.
“Badala ya kujibu ukweli kuhusu maandamano ya tarehe 29 wanachunguza watu kwamba wamefanya uhalifu, wanasingizia kuna ‘foreign influence, madai ya watu yanajulikana watu wanaposingiziwa kuwa ni wahalifu wantengeneza watu wafanye ‘revenge’ hoja zake zote kimsingu Mwigulu amekwepa ukweli, amepindua ukweli, amepindua masimulizi”, alisema Golugwa.
Katika mkutano na wahariri, Miongoni mwa yaliyoulizwa na wahariri ni pamoja na takwimu za vifo vilivyosababishwa na vurugu hizo, ukweli kuhusu makaburi ya halaiki, uhuru wa vyombo vya Habari, utekaji, mauaji na serikali inafanya nini kuelekea Desemba 9 ambako tayari mikakati ya maandamano inachagizwa zaidi kupitia mitandao ya kijamii.
Chama hicho cha upinzani nchini Tanzania wametaka tume huru ya uchunguzi ambayo itahusisha mataifa ya ndani na nje, wakiiitaka serikali isikilize madai ya watu kuhusu waliotekwa, kuuawa na hiyo iwe tahadhari ya matamshi ya ukutani kuelekea Desemba 9 ambayo ni siku ya Uhuru lakini pia ni siku ambayo huenda ikachochea maandamano.