Serikali ya Korea Kaskazini imeanzisha lugha ya Kirusi, kama somo la lazima nchini humo, ikiwa ni hatua ya kukuza ushirikiano kati ya Moscow na Pyongyang.
Hatua hiyo inakuja, huku Alexander Kozlov, ambaye pia ni Waziri wa Maliasili na Mazingira nchini Urusi, akiweka wazi kuwa, kuna zaidi ya wanafunzi 3,000 wanaojifunza lugha ya Kikorea nchini humo.
“Lugha ya Kirusi kwa sasa ni somo la lazima kwenye shule mbalimbali Korea Kaskazini, likianza kufundishwa kuanzia darasa la nne. Vivyo hivyo, nchini Urusi kuna zaidi ya wanafunzi 3,000 ambao wanajifunza lugha ya Kikorea. Wengi wao wanajifunza Kikorea kama lugha yao ya pili na ya tatu,” alisema Kozlov.
Kulingana na waziri huyo, mataifa hayo mawili, pia yanalenga kushirikiana kwenye sekta nyinginezo, zikiwemo benki, nishati na elimu tiba.
Katika miaka ya hivi karibuni, uhusiano wa nchi hizo mbili umezidi kushamiri, ikiwemo kutumwa kwa vikosi vya kijeshi kushughulikia mgogoro kati ya Urusi na Ukraine.