Idadi ya vifo kutokana na mafuriko makubwa na maporomoko ya ardhi Kusini-mashariki mwa Asia, imepindukia watu 400 huku shughuli za usafi, utafutaji na uokoaji zikiendelea nchini Indonesia, Thailand na Malaysia.
Mvua kubwa ya masika imenyesha sehemu kubwa ya nchi hizo tatu wiki hii na kuwaacha maelfu wakikwama, wengi wakiwa juu ya mapaa wakisubiri kuokolewa. Waokoaji nchini Indonesia wanajitahidi kufika maeneo yaliyoathiriwa zaidi ya kisiwa cha Sumatra, ambapo zaidi ya watu 270 bado hawajulikani waliko.
Mafuriko na maporomoko ya ardhi nchini humo yamewaua zaidi ya watu 300, kulingana na takwimu za mamlaka inayoshugulikia maafa. Huko nchini Thailand, viwango vya maji vilifikia mita tatu katika jimbo la kusini la Songkhla na kuua watu 162 katika moja ya mafuriko makubwa zaidi kuwahi kutokea katika kipindi cha muongo mmoja.