TANGA: BANDARI ya Tanga imezidi kufunguka kutokana na kupokea meli za mizigo kwa wingi ambapo MV Parnia yenye mizigo ya makasha 463 kutoka Iran imetia nanga.
Hatua hiyo ni sehemu ya uwekezaji uliofanywa na serikali kwa ujenzi wa gati sambamba na ununuzi wa vifaa vya kisasa vya upakuaji wa shehena za mizigo, hivyo kuongeza ufanisi kwenye bandari hiyo.
Akizungumza wakati wa upokeaji wa meli hiyo, Mkuu wa Mkoa wa Tanga, Dk Batilda Burian aliwataka wafanyabiashara kuchangamkia fursa ya ujio wa meli hiyo, kuhakikisha inarudi na shehena ya mzigo kutoka nchini. “Wafanyabiashara wa katani, mazao ya viungo sambamba na kahawa ni fursa kwenu kupeleka bidhaa hizo nchini Iran, kwani kuna uhitaji mkubwa wa bidhaa hizo,” alisema.
Kwa upande wake, wakala wa meli hiyo, Athuman Kimaro alisema ujio wa meli hiyo utaongeza fursa ya kiuchumi na kufungua milango ya biashara mkoani Tanga. “Tumejipanga kuhakikisha ndani ya kila mwezi tunaleta meli tatu hadi nne kutoka nchini Iran kuja katika Bandari ya Tanga kutokana na kuimarika kwa huduma kwenye bandari hiyo,” alisema.
Kaimu Meneja wa Bandari ya Tanga, Peter Milanzi alisema wamejipanga kuhakikisha wanahudumia meli za mizigo ndani ya siku tatu hadi nne, lengo likiwa ni kupunguza muda wa meli kukaa na kuifanya bandari hiyo kufanya kazi kwa ufanisi zaidi.
“Tunaishukuru serikali kwa uwekezaji huu, kwani umetuwezesha kuongeza ufanisi katika kuhudumia mizigo kwa wakati lakini katika siku chache zaidi tofauti na hapo awali,” alisema Milanzi.
Wafanyabiashara wa mkoani Tanga walisema kuwa matunda ya uboreshaji wa bandari hiyo wameanza kuyaona hadi kwenye biashara zao.
“Kuna mwitikio mkubwa wa ufanyaji biashara kutokana na kufunguka kwa bandari yetu, hali hiyo inatufanya kuanza kufikiria kupanua wigo wa biashara zetu kwenda maeneo mengine nje ya nchi,” alisema Mwenyekiti wa Masoko Mkoa wa Tanga, Athumani Mohamed.