ARUSHA: WAZIRI wa Habari, Utamaduni, Sanaa na Michezo, Profesa Palamagamba Kabudi amewataka vijana nchini kuwa na tabia ya kusikiliza hotuba za viongozi wakuu wa nchi na wasifu wao ili wawe mstari wa mbele kuilinda nchi na misingi yake.
Profesa Kabudi alisema hayo jana jijini Arusha wakati wa kuzindua kitabu cha tawasifu kilichoandikwa na Balozi Daniel ole Njoolay juu ya maisha yake binafsi na alipokuwa kiongozi serikalini ambacho kimejaa simulizi ya maisha halisi.
Alisema katika hotuba ya Baba wa Taifa, Mwalimu Julius Nyerere ya mwaka 1965 aliwataka vijana kuilinda nchi kwa gharama kubwa, ikiwa ni pamoja na kufuata maadili na misingi ya taifa.
Alisema vijana wa sasa wangekuwa wanasikiliza hotuba hiyo na kusoma wasifu wa viongozi wa zamani, hali iliyojitokeza hivi karibu isingekuwepo.
Profesa Kabudi alisema mbali ya hotuba hiyo ya mwaka 1965, pia Balozi Njoolay katika kitabu chake amegusia vijana kuwa wachapakazi, kuacha kuchagua kazi, kutokata tamaa, kuwa waadilifu na waaminifu, kuacha tamaa na kulinda misingi ya nchi iliyoasisiwa viongozi wa zamani.
Alisema hotuba za Baba wa Taifa za miaka hiyo ya nyuma zina utabiri mkubwa kwa vijana na maonyo ndani yake na vijana wanapaswa kujikita katika kusikiliza hotuba hizo mara kwa mara ili waweze kuwa walimu wazuri kwa wengine katika kuilinda nchi yao.
Profesa Kabudi alisikitishwa na Baba wa Taifa kutoandika kitabu chake mwenyewe na kusema kuwa iwapo kitabu hicho angekiandika yeye mwenyewe, kingekuwa na maana kubwa kwani katika uongozi wake aliongoza nchi katika misukosuko mikubwa na hayo yote anayajua yeye mwenyewe.
Alitoa rai kwa viongozi wengine nchini waliopo madarakani kuwa na tabia ya kuandika kitabu cha kuelezea maisha binafsi ya kiuongozi kama Balozi Njoolay, kwani kitabu alichokizindua kimesema ukweli na uhalisia mzima wa maisha ya balozi huyo akiwa shuleni, kazini na baada ya kazi.
Kwa upande wake, Balozi Njoolay alisema ametumia miaka mitatu kukamilisha kitabu hicho na uamuzi huo ameufanya kutokana na msukumo kutoka kwa marafiki zake.
Alieleza alivyosoma katika mazingira magumu kwa kuwa kabila lake la Kimasai enzi hizo elimu kwao ilikuwa si muhimu na mbuzi waliuzwa ili kulipa ada. Mkurugenzi Mtendaji wa Mchapishaji Mkuki, Mkuki Bgoya alisema vijana wanaotaka ama wanaochaguliwa uongozi wanapaswa kujifunza kwa kusoma kitabu hicho.