Manchester, England. Baada ya kupita katika kipindi kigumu cha kutopata ushindi katika mechi tatu mfululizo za Ligi Kuu England, wikiendi iliyopita Manchester United ilifanikiwa kupata ushindi mbele ya Crystal Palace ugenini.
Man United ambayo ilishinda mabao 2-1, kabla ya mechi hiyo ilikuwa imetoa sare ya mabao 2-2 dhidi ya Nottingham Forest, kisha sare kama hiyo tena mbele ya Tottenham kabla ya kupoteza kwa bao 1-0 dhidi ya Everton.
Hii ilikuwa ni mechi ya sita kwa Man United kushinda msimu huu ikiwa imefikisha pointi 21 ambazo ziliipandisha hadi nafasi ya saba katika msimamo.
Kabla ya mechi hii, Man United haikuwa imeshinda hata mechi moja kati ya nne za mwisho ilipokutana na Palace katika Ligi Kuu England kuanzia mwaka 2023.
Katika kipindi chote hicho hadi kufikia sasa, Palace ilikuwa imeshinda mechi tatu na kutoa sare moja ambayo ilikuwa ni mechi ya raundi ya kwanza ya msimu uliopita.
Palace ilionekana kutawala mechi katika kipindi cha kwanza hadi ikapata bao kupitia mkwaju wa penalti baada ya staa wao Jean Philipe Mateta kuangushwa katika boksi na beki wa Man United, Leny Yoro.
Hata hivyo, penalti ya kwanza iliyopigwa na Mateta ilifutwa na mwamuzi baada ya kuonekana ameugusa mpira mara mbili wakati anaenda kuupiga, hivyo akatakiwa kurudia na bado alifunga na kuiwezesha Palace kuongoza katika dakika ya 36 ya kipindi cha kwanza.
Man United ilionekana kurejea mchezoni katika kipindi cha pili ambapo ilisawazisha kupitia kwa Joshua Zirkzee aliyepata pasi kutoka kwa kapteni Bruno Fernandes ambaye pia alitoa asisti ya bao la ushindi lililofungwa na Mason Mount katika dakika ya 63.
Baada ya mchezo huu, Man United itarudi nyumbani Desemba 04, kuikaribisha West Ham United inayopitia wakati mgumu na baada ya hapo itatoka kwenda ugenini kucheza dhidi ya Wolves Desemba 08.
Palace ambayo ni kati ya timu zinazofanya vizuri msimu huu, ilikuwa inahitaji sana kushinda mechi hiyo ili kupanda hadi katika Top 4 kwa kufikisha pointi 23 kutoka 20 ambazo iko nazo kwa sasa.
Katika mechi ijayo, Palace itakuwa na kibarua mbele ya timu yenye hali ngumu katika EPL msimu huu, Burnley Desemba 03 na baada ya hapo itacheza dabi ya London dhidi ya Fulham, Desemba 07.
Mbali ya mechi hii ya Man United ambayo ilikuwa ya mapema, katika ligi nyingine barani Ulaya pia kulikuwa na baadhi ya mechi za mapema. Kule Italia ilikuwa ni kati ya Lecce na Torino iliyomalizika kwa Lecce kushinda kwa mabao 2-1.