Kufuatia mkutano wa kilele uliofanyika kwa njia ya video jioni ya Jumatatu, Juni 29, Jumuiya ya Maendeleo Kusini mwa Afrika (SADC) imetoa taarifa ikitaka “kuachiliwa kwa wafungwa wa kisiasa,” “kukomeshwa kwa kukamatwa kiholela kwa viongozi wa upinzani na wanaharakati wa vuguvugu la vijana la Gen Z,” na kurejea nchini kwa “wakimbizi wa kisiasa” walio uhamishoni.
Imechapishwa:
Dakika 1 Wakati wa kusoma
Matangazo ya kibiashara
Na mwandishi wetu huko Antananarivo, Guilhem Fabry
Ingawa hapo awali ilikuwa imechukua msimamo wa upatanishi kuelekea mamlaka ya mpito ya Madagascar kwa kutosimamisha taifa hilo kwa taasisi zake licha ya jeshi kuchukua mamlaka mwezi Oktoba mwaka uliyopita—tofauti na Umoja wa Afrika—Jumuiya ya Maendeleo ya Kusini mwa Afrika (SADC) imeamua kuchukua msimamo mkali dhidi ya Madagascar.
Karibu miezi tisa baada ya kuanguka kwa Andry Rajoelina, Rais wa Afrika Kusini Cyril Ramaphosa aliongoza mkutano usio wa kawaida wa SADC kuhusu hali ya kisiasa nchini humo siku ya Jumatatu, Juni 29. Mkutano huo uliofanyika kwa njia ya video, na kutoa taarifa ya mwisho inayotaka “kuachiliwa kwa wafungwa wa kisiasa” na “kukomeshwa kwa kukamatwa kiholela kwa viongozi wa upinzani na wanaharakati wa vuguvugu la vijana la Gen Z.”
Wito huu unakuja huku angalau washirika ishirini wa utawala wa zamani nchini Madagascar wanakabiliwa na kesi za kisheria, na viongozi watatu wa vuguvugu la vijana la Gen Z wameshtakiwa kwa “kuhatarisha usalama wa taifa” baada ya kuitisha maandamano ya amani katikati ya mwezi Aprili.
Mkutano wa SADC, ambao ulifanyika akiwepo Rais wa Madagascar Michael Randrianirina, pia ulitoa wito wa kurejea kwa “wakimbizi wa kisiasa” walio uhamishoni na kurudia wito wa mazungumzo jumuishi nchini. Taarifa hiyo inasisitiza “umuhimu wa kuhifadhi utawala wa sheria na utawala wa kidemokrasia” na inakumbusha “kwamba mageuzi yanatarajiwa kurejesha utaratibu wa kikatiba na kusababisha kuanzishwa kwa serikali iliyochaguliwa kidemokrasia inayoheshimu matakwa ya watu wa Madagascar.”
Mkutano huu ulitokana na matokeo ya mfululizo wa misheni tatu za tathmini kuhusu hali ya kisiasa nchini Madagascar zilizofanywa na SADC kati ya mwezi Oktoba 2025 na Mei 2026.