BONDIA wa Tanzania, Yusufu Changarawe, ameanza vyema kampeni yake katika Michezo ya Jumuiya ya Madola 2026 inayoendelea Glasgow, Scotland baada ya kumpiga David Akintola wa Nigeria kwa pointi katika pambano la uzani wa kilogramu 80 (Light Heavyweight) na kutinga hatua ya 16 Bora.
Changarawe alionyesha ubora mkubwa kuanzia raundi ya kwanza hadi ya mwisho, akitumia uzoefu wake wa mashindano makubwa kudhibiti mashambulizi ya mpinzani wake. Baada ya raundi tatu, majaji watatu kati ya watano walimpa ushindi bondia huyo wa Tanzania huku wawili wakimpa Akintola.
Ushindi huo unamfanya Changarawe kusonga mbele katika hatua ya 16 Bora, ambapo atarejea ulingoni Jumatatu, Julai 27, 2026 kuwania tiketi ya robo fainali ya mashindano hayo.
Changarawe si mgeni kwenye majukwaa makubwa ya kimataifa. Katika Michezo ya Jumuiya ya Madola ya Birmingham mwaka 2022 aliweka historia kwa kutwaa medali ya shaba katika uzani wa Light Heavyweight, baada ya kushinda mapambano mawili kabla ya kutolewa hatua ya nusu fainali.
Medali hiyo ilimfanya kuwa mmoja wa mabondia wachache wa Tanzania kurejea nyumbani na medali kutoka Michezo ya Jumuiya ya Madola.
Kwa mujibu wa rekodi za BoxRec, Changarawe amekuwa akipigana ngumi za ridhaa tangu mwaka 2019 na amecheza mapambano 17, akishinda tisa na kupoteza manane, huku akiwa na ushindi wa mapambano matatu kwa KO.
Kutokana na uzoefu wake wa kimataifa na mafanikio aliyoyapata Birmingham 2022, Changarawe anatajwa kuwa miongoni mwa matumaini makubwa ya Tanzania katika mchezo wa ngumi kwenye Michezo ya Jumuiya ya Madola ya mwaka huu.
Ushindi wa kwanza dhidi ya Akintola umeongeza matumaini kwamba anaweza kufika mbali zaidi na hata kupigania medali nyingine kwa Tanzania.
Akizungumzia ushindi huo, Changarawe amesema: “Mechi ilikuwa ngumu sana na mpinzani wangu alikuwa vizuri, nilitumia akili yangu na kile nilichofundishwa na kocha wangu kushinda, nimejipanga vizuri kwa sababu haya ni mashindano na nimekuja vitani kupigana ili kupita hatua inayofuata.”