Hatua zaidi imechukuliwa kuelekea mahakama ya baadaye nchini Liberia yenye jukumu la kuwahukumu wale waliohusika na ukatili uliofanywa wakati wa vita viwili vya wenyewe kwa wenyewe kati ya mwaka 1989 na 2003.
Imechapishwa:
Dakika 1 Wakati wa kusoma
Matangazo ya kibiashara
Wiki iliyopita, Ofisi ya Kamishna Mkuu wa Haki za Binadamu wa Umoja wa Mataifa iliwafunza wanasheria ishirini wa Liberia waliobobea katika uhalifu wa kimataifa, katika maandalizi ya kuanzishwa kwa mahakama ya baadaye. Serikali ya Liberia inasema kwamba imetenga zaidi ya dola milioni 1.3 katika bajeti ya mradi huu.
Angalau wanasheria hamsini wanatarajiwa kupata mafunzo kwa jumla, na waendesha mashtaka na wachunguzi wapatao ishirini wanazingatiwa kuwa wafanyakazi wa mahakama ya baadaye.
Vigezo vya kuajiri ni vikali: kutohusika katika vita vya wenyewe kwa wenyewe, kutohukumiwa. Uamuzi mwingine muhimu ni kutafuta eneo. Eneo la mahakama hiyo linachukuliwa kuwa nyeti, anaelezea Jallah Barbu, mkurugenzi mtendaji anayehusika na kuanzisha Mahakama ya Vita na Uhalifu wa Kiuchumi.
“Tunaweza kuanzisha mahakama hii wapi kwa usalama? Tunawafikiria waendesha mashtaka, majaji, washtakiwa—na kuhusu kuzuia mtu yeyote kukwamisha kesi kuanzia wakati mahakama itakapofunguliwa,” anasema.
Kesi za kwanza zinatarajiwa mwaka wa 2027. Kwa Jallah Barbu, zaidi ya vipengele vya kiufundi, mahakama hii lazima pia itume ujumbe mzito. “Kwanza, lazima tuseme: ‘Kamwe uhalifu huu usirudi tena.’ Hakuna mtu anayepaswa kutumia tena aina hizi za mbinu kutatua masuala ya kisiasa au utawala nchini Liberia. Tumejaribu kupatanisha raia wa nchi hii, lakini maridhiano bila haki—bila fidia kwa wale walioteseka wakati wa vita na bado wanakumbwa na athari za vita hivyo—hatuoni jinsi yanavyoweza kufanikiwa.”
Kwa upande wa kisheria, Jallah Barbu anahakikisha kwamba rasimu ya miswada sasa iko mezai kwa Rais Joseph Boakai, kabla ya kutumwa Bungeni.
Nakala hizi zinaanzisha Mahakama ya Vita na Uhalifu wa Kiuchumi: mahakama mseto, yenye idadi maalum ya majaji na vifungu vya mashahidi. Kesi za kwanza zinatarajiwa ifikapo mwezi Novemba 2027.