Mama wa Mchuuzi Aliyeuawa na Polisi Akanusha Mwanawe Alikuwa Mwanachama wa Kiengei

• Mamake Boniface Kariuki alipuuzilia mbali madai kwamba mwanawe alikuwa muumini wa kanisa la Muthee Kiengei la JCM, akitaja sababu zake
• Matamshi yake yanajiri miezi michache baada ya Kiengei kusimamia mazishi ya Kariuki na uchunguzi upya kufuatia ziara ya Rais William Ruto kanisani hapo
• Mama huyo aliyejawa na huzuni pia alielezea kusikitishwa na kutamaushwa kwa mazishi hayo, akidai kwamba ahadi zote zilizotolewa kwa familia hazijatimizwa

Kizaazaa kipya kimezuka miezi kadhaa baada ya kifo na kuzikwa kwa Boniface Kariuki, mchuuzi wa barakoa ambaye alipigwa risasi wakati wa maandamano katika eneo la CBD mwaka jana.

Kariuki alikuwa akiwauzia waandamanaji barakoa mnamo Juni 2025 wakati maafisa wawili wa polisi waliokuwa na silaha walipomkabili.

Nini kilimpata Boniface Kariuki?

Video ambazo zilisambaa mtandaoni zilionyesha mchuuzi huyo ambaye hakuwa na silaha akishambuliwa kabla ya afisa mmoja kumpiga risasi kichwani na kumwacha akidhania kuwa amefariki.

Waandamanaji walimkimbiza hospitalini na kumfunika bendera ya Kenya. Ingawa awali alinusurika, baadaye aliaga dunia alipokuwa akipokea matibabu katika Hospitali ya Kitaifa ya Kenyatta.

Pia soma

Nakuru: Mwanamke Ashangaza Kushirikiana na Wanawe 3 Kupanga Mauaji ya Mumewe

Kifo chake kilizua ghadhabu kote nchini, huku Wakenya wengi wakitaka haki na uwajibikaji utendeke.

Je, Boniface Kariuki alikuwa muumini wa kanisa la JCM?

Kufuatia kifo cha Kariuki, Muthee Kiengei, askofu mkuu katika Kanisa la JesusChrist Compassion Ministries (JCM), alisema alipata habari kwamba mchuuzi aliyeuawa alikuwa muumini wa kanisa lake.

Kwa msingi wa madai hayo, Kiengei aliongoza mazishi ya Kariuki nyumbani kwake kijijini Kangema, Kaunti ya Murang’a.

Hata hivyo, suala hilo limeibuka tena baada ya Rais William Ruto kuzuru kanisa la Kiengei huko Ruiru hivi majuzi.

Ziara hiyo iliibua mjadala mtandaoni, huku baadhi ya Wakenya wakilinganisha matamshi makali ya mhubiri huyo kuhusu serikali wakati wa mazishi ya Kariuki na uamuzi wake wa kumkaribisha Ruto miezi kadhaa baadaye.

Ibada ya kanisa la Ruiru ilipoendelea, sehemu ya wanamtandao wa TikToke walisafiri hadi katika kaburi la Kariuki huko Kangema na kushiriki picha pamoja na mamake, wakiwa wamesimama kando ya kaburi lake ambalo halijatunzwa.

Wakati wa mahojiano, mamake Kariuki alikanusha madai kwamba mwanawe alikuwa mwanachama wa JCM.

Pia soma

Machakos: Familia Yalia Kumpoteza Binti Wao Aliyefariki katika Shule ya Bweni

Alidai kuwa hakuwa na kadi ya uanachama wala kuhudhuria kanisa hilo, na kuongeza kuwa yeye mwenyewe hajawahi kuabudu hapo.

Alidai kuwa ni binamu yake ambaye alifanya mipango akipendekeza Kariuki ni mfuasi wa kanisa la Kiengei, akisisitiza kwamba madai hayo ni ya uwongo kabisa.

Kwa maneno yake:

“Hakuna kitu kama hicho. Boni hakuwahi kuwa na kadi ya uanachama, na hajawahi hata kwenda kanisani. Ni binamu yake ndiye aliyepanga mipango hiyo na kudai kuwa yeye ni wa kanisa la Kiengei, lakini haikuwa kweli.”

Mama huyo aliyeomboleza alidai zaidi kuwa pasta wake wa eneo hilo alimshauri kuruhusu JCM kuendesha mazishi ikiwa tayari ilikuwa imeamuliwa, kwa madai kuwa Kanisa la Anglikana la Kenya (ACK) halifanyi mazishi kwa njia sawa.

Alidai mchungaji wake wa ACK hakuhudhuria mazishi kwa sababu, kwa maoni yake, msingi ambao uliandaliwa ulikuwa wa uongo.

Pia alieleza kusikitishwa kwake, kwa madai kuwa licha ya kuahidiwa kurejea na kusaidia familia baada ya mazishi, Kiengei hakufanya hivyo.

Kuhusu suala la Kiengei kuwa mwenyeji wa Rais Ruto, alisema hakufurahishwa na maendeleo hayo na hakuona kuwa yanafaa.

Pia soma

Video: Rigathi Gachagua asinywa na swali la mwanahabari wa Chamgei FM kumhusu Ruto

Rais Ruto alitoa kiasi gani kwa familia ya Boniface Kariuki?

Kabla ya mazishi ya Boniface Kariuki, Rais Ruto alituma risala zake za rambirambi kwa familia iliyoachwa.

Kando na maneno yake ya huruma, alitoa KSh 1 milioni kusaidia familia hiyo, ambayo iliripotiwa kukabiliwa na gharama ya jumla ya KSh 3.6 milioni.

Read ENGLISH VERSION

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia news@tuko.co.ke au WhatsApp: 0732482690.

Chanzo: TUKO.co.ke