Askari na maafisa wa polisi kutoka Sierra Leone wanashikiliwa nchini nchini Guinea. Walikamatwa na vikosi vya usalama vya Guinea kati ya Jumapili, Septemba 22, na Jumatatu, Septemba 23, katika eneo la mpaka kati ya nchi hizo mbili.
Imechapishwa:
Dakika 2 Wakati wa kusoma
Matangazo ya kibiashara
Tukio hilo lilitokea kati ya wilaya ya Falaba nchini Sierra Leone na wilaya ya Koudaya nchini Guinea. Mamlaka kutoka nchi zote mbili, ambazo zinashiriki mpaka wa zaidi ya kilomita 700, zimethibitisha tukio hilo lakini zimetoa maelezo tofauti katika taarifa zao.
Je, wanajeshi wa Sierra Leone waliingia katika eneo la Guinea kinyume cha sheria? Au, kinyume chake, je, wanajeshi wa Guinea walivuka mpaka kuwakamata wanajeshi wa usalama wa Sierra Leone?
Wizara ya Mawasiliano ya Sierra Leone ilikuwa ya kwanza kuthibitisha vikosi vya jeshi la Guinea kuwakamata “wanachama kadhaa wa timu ya pamoja” iliyojumuisha wanajeshi na maafisa wa polisi wa Sierra Leone. Kulingana na taarifa hiyo, maafisa hawa walikuwa katika mji wa Kalieyereh (wilaya ya Falaba), ambapo walikuwa na jukumu la kujenga kituo cha mpaka.
Pia kulingana na mamlaka ya Sierra Leone, wanaume waliokamatwa, “pamoja na afisa mmoja,” walipelekwa “eneo la Guinea,” ambapo silaha na risasi zao zilichukuliwa.
Conakry inaripoti kukamatwa kwa “wanajeshi kumi na sita wa Sierra Leone”
Ingawa mamlaka ya Sierra Leone inasema wanataka kutatua suala hilo “kwa amani,” makao makuu ya jeshi la Guinea yamethibitisha kukamatwa kwa “wanajeshi kumi na sita wa Sierra Leone.”
Kulingana na Conakry, watu hawa wanadaiwa “waliingia katika eneo la Guinea bila idhini,” ambapo inaripotiwa “waliweka hema na kuinua bendera yao ya taifa” takriban kilomita 1.4 kutoka mpaka wa Guinea.
Makao makuu ya jeshi la Guinea pia imewataka vikosi vya ulinzi na usalama vya nchi hiyo “kuendelea kuhamasishwa kwa ajili ya ulinzi na kulinda mipaka, ardhi.”
Miongo miwili ya migogoro ya mpakani
Tukio hili linakuja huku kukiwa na mvutano unaoendelea wa mpaka kati ya Sierra Leone na Guinea. Nchi hizo mbili zimekuwa katika mgogoro kwa karibu miaka ishirini kuhusu kijiji cha madini cha Yenga, ambacho kinadaiwa na nchi zote mbili.
Uvamizi wa wanajeshi wa Guinea katika eneo hili ulishutumiwa na Freetown mwezi Mei. Mnamo mwezi Septemba, ECOWAS ilituma ujumbe wa kiufundi katika eneo hilo.