Waasi wa Allied Democratic Forces (ADF) wametekeleza shambulio jipya huko Mambasa, mji mkuu wa eneo lenye jina moja, katika mkoa wa Ituri, kaskazini mashariki mwa Jamhuri ya Kidemokrasia ya Kongo (DRC)usiku wa Jumapili, Aprili 5, kuamkia Jumatatu, Aprili 6. Hakuna majeruhi walioripotiwa awali. Hili ni shambulio la sita katika siku nane linalohusishwa na kundi hili lenye silaha – ambalo limeahidi utii kwa kundi la Islamic State – katika eneo la Mambasa.
Imechapishwa: Imehaririwa:
Dakika 2 Wakati wa kusoma
Matangazo ya kibiashara
“ADF hawajawahi kushambulia karibu katikati ya mji wa Mambasa,” wawakilishi wa mashirika ya kiraia walionyesha wasiwasi. Shambulio hilo lilifanyika yapata saa 5:00 usiku wa Jumapili, Aprili 5. ADF ilifika kutoka kaskazini na kuingia mjini. Nyumba kadhaa zilichomwa moto, na maduka yaliporwa. Hakuna idadi rasmi ya vifo ambayo imetangazwa hadi sasa, lakini ADF ilichukua mateka watu kadhaa “kusafirisha bidhaa walizokuwa wamepora,” kulingana na mashirika ya kiraia.
Siku ya Jumatatu, Aprili 6, shughuli zilizorota katika mji wa Mambasa. Maduka na shule zilifungwa. “Wakazi waliingiliwa na hofu kubwa,” alisema Julien Paluku shirika moja la kiraia. “Wakulima hawathubutu tena kwenda mashambani mwao, na baadhi ya wakazi tayari wanafikiria kuondoka mjini,” aliongeza.
Shambulio hili ni la hivi karibuni katika mfululizo wa mahambulizi ya kundi hili la wanajihadi katika eneo la Mambasa, ambapo mashambulizi yameongezeka zaidi ya mwezi uliopita. Kabla ya kushambulia katikati ya mji wa Mambasa, ADF ilishambulia eneo la uchimbaji madini la Muchacha katikati ya mwezi Machi, kisha miji ya Mutshanga, Babugwe, na Bafwakoa, kila wakati ikiua makumi ya watu na kusababisha watu wengi kuhama makazi yao.
Siku nane zilizopita, takriban raia 15,000 walitafuta hifadhi katikati ya mji wa Mambasa, ambapo kuna kambi ya jeshi. Jeshi linadai kulipiza kisasi dhidi ya shambulio hilo Jumapili usiku na kuwaangamiza wapiganaji watano wa ADF.
Kulingana na Ildefonse Bwakyaniakazi, mtafiti katika Taasisi ya Ebuteli, kundi la ADF lilitumia fursa ya kutokuwepo kwa vikosi vya usalama katika eneo la Mambasa kupanua wigo wake na kuanzisha mashambulizi, hali ambayo inasababisha wasiwasi huko Kinshasa. Wakati wa mkutano wa mwisho wa baraza la mawaziri siku ya Ijumaa, Aprili 3, Naibu Waziri Mkuu na Waziri wa Ulinzi Guy Kabombo walirejelea mada hiyo, wakihakikishia kwamba vikosi vya jeshi la Kongo vinafanya kazi ya kuzima vurugu hizi za kigaidi katika eneo la Mambasa.