Mashariki mwa DRC, hali ya usalama inaendelea kuzorota katika maeneo yanayodhibitiwa na waasi wa Uganda wa ADF, kundi lenye silaha ambalo lilitangaza kujiunga na kundi la Islamic State. Kivu Security Tracker (KST), taasisi ya utafiti inayofuatilia matukio ya usalama katika eneo hilo, inaripoti ongezeko la visa vya utekaji nyara kwa kiwango kisicho cha kawaida na upanuzi wa tishio hilo katika mkoa mpya.
Imechapishwa:
Dakika 2 Wakati wa kusoma
Matangazo ya kibiashara
Na mwandishi wetu huko Kinshasa, Paulina Zidi
Ripoti ya Kivu Security Tracker inataja “uwepo wa wapiganaji wa ADF uliothibitishwa kwa mara ya kwanza huko Haut-Uélé,” jimbo lililoko kaskazini mwa Ituri na linalopakana na Sudan Kusini. Ripoti hiyo inataja mashambulizi kadhaa dhidi ya raia katika eneo hili, ambalo linapatikana kati ya eneo la Mambasa na Haut-Uélé.
Mnamo mwezi Machi, Mambasa ikawa kitovu cha vurugu za ADF katika wiki za hivi karibuni. Zaidi ya raia 103 wameuawa katika kipindi cha mwezi mmoja katika eneo hili, ambapo hakukuwa na majeruhi mnamo mwezi Februari. Vurugu zimeongezeka, huku idadi kubwa ya visa vya utekaji nyara ikiongezeka: zaidi ya visa 400 vimerekodiwa. Baadhi ya mateka wameachiliwa bila fidia, inaelezea KST, ambayo inaelezea mbinu za kundi hilo lenye silaha kwa wale ambao bado wameshikiliwa mateka. Watekaji nyara wanadai kati ya dola 2,500 na dola 10,000 kutoka kwa familia zao.
Kulingana na waandishi wa ripoti hii, matukio haya yote yanaonyesha wazi harakati za ADF ndani ya nchi. Mabadiliko haya yameonekana tangu kuanza kwa Operesheni Shujaa mwaka wa 2021. Operesheni hii ya pamoja kati ya Uganda na DRC imepata mafanikio kadhaa, lakini wataalamu wengi wanaamni pia inahamisha tishio kuelekea magharibi, haswa kwa mkoa wa Tshopo, na sasa kuelekea kaskazini hadi Haut-Uélé.
MONUSCO inathibitisha tena uungaji mkono wake kwa mamlaka. Akiwasili Beni, mji wa mpakani katika eneo la Mambasa, Jumatatu, Aprili 20, mkuu mpya wa MONUSCO, James Swan, alibainisha kwamba jiji na viunga vyake “linaendelea kukabiliwa na vitisho vikali vinavyohusiana na shughuli za makundi yenye silaha, haswa ADF, ambavyo vinaendelea kuathiri vibaya raia.”
Katika ziara yake ya kwanza kuelekea mashariki mwa nchi, Mwakilishi Maalum mpya wa Katibu Mkuu wa Umoja wa Mataifa alisisitiza umuhimu wa kuwalinda raia kupitia “hatua zilizoratibiwa kati ya mamlaka ya Kongo, vikosi vya usalama wa taifa, MONUSCO, wadau wa kibinadamu, na jamii zenyewe.”