Iran imepinga vikali taarifa ya Sekretarieti ya Umoja wa Mataifa kwa nchi wanachama kuhusu kutumika tena maazimio yaliyohitimisha muda wake yanayoilenga Jamhuri ya Kiislamu kwa vikwazo.
Katika barua rasmi ya tarehe 28 Septemba, balozi na mwakilishi wa kudumu wa Iran katika Umoja wa Mataifa, Amir Saeid Iravani, amemhutubu Katibu Mkuu wa Umoja wa Mataifa António Guterres na rais wa Baraza la Usalama la Umoja wa Mataifa, akielezea pingamizi kali ya Iran kwa hatua ya Sekretarieti ya umoja huo.
Katika barua hiyo, Iravani amesema Azimio nambari 2231 la Baraza la Usalama halitoi mamlaka yoyote kwa Katibu Mkuu au Sekretarieti ya “kuamua, kutangaza, au kuziarifu” nchi wanachama kuhusu kile kinachoitwa utumiaji mpya wa maazimio yaliyohitimishwa.
“Azimio hilo linaweka utaratibu maalumu chini ya ibara ya 11 na 12 ya kiutendaji, kuweka suala hilo ndani ya mamlaka ya Baraza la Usalama pekee,” ameeleza barua wa Iran UN.
Amesisitiza kuwa hatua ya upande mmoja ya Sekretarieti inavuka mamlaka yake na inaingilia eneo la mamlaka ya Baraza la Usalama.
Amekumbusha tukio la Oktoba 2020, wakati Marekani pia ilipojaribu kuibua utaratibu wa “snapback”, lakini mgawanyiko mkubwa uliozuka ndani ya Baraza la Usalama juu ya uhalali wa hatua kama hiyo uliizuia Sekretarieti kuchukua hatua za upande mmoja au za kiutawala kutekeleza hatua hiyo ya Washington.
“Kizuizi kilichoonyeshwa wakati ule kilithibitisha kutokuwa na mamlaka yoyote Sekretarieti ya UN kujichukulia hatua chini ya azimio 2231 katika suala hili linalobishaniwa sana,” ameeleza Iravani.
Balozi wa Iran katika Umoja wa Mataifa amesema, Sekretarieti hiyo imeegemea upande wa nchi tatu za Ulaya za Ujerumani, Uingereza na Ufaransa pamoja na Marekani kwa kutoa taarifa hiyo kwa makusudi licha ya kuwepo kwa uwazi hali ya kutoelewana kati ya nchi wanachama, na licha ya kutopatikana mwafaka katika mkutano wa Baraza la Usalama wa Septemba 19, 2025…/