Rais wa Ukraine Volodymyr Zelensky amesema siku ya Jumatatu, Juni 15, kwamba alikuwa amependekeza mkutano na mwenzake wa Urusi, Vladimir Putin, katika mkutano wa kilele wa G7 nchini Ufaransa, lakini kwamba Urusi “haiko tayari” kujadili kukomesha vita nchini Ukraine.
Imechapishwa:
Dakika 1 Wakati wa kusoma
Matangazo ya kibiashara
“Tumewasilisha ujumbe kwamba tuko tayari kukutana na Vladimir Putin katika mkutano wa G7, kwa sababu Donald Trump yuko pale, Emmanuel Macron yuko pale, Keir Starmer, Friedrich Merz, hivyo viongozi wa Ulaya pamoja na rais wa Marekani. Ni fursa nzuri sana kwetu sote kukutana,” kiongozi huyo wa Ukraine aliwaambia waandishi wa habari kwa Kiingereza.
“Ulaya na Marekani zimetoa makubaliano yao, na Urusi imeonyesha tena kwamba haiko tayari kuzungumza,” alisema Volodymyr Zelensky, akiongeza kwamba shinikizo lazima liongezwe kwa rais wa Urusi “hadi atakapokubali kusitishavita.”
Mkutano wa kwanza wakataliwa
Kiongozi huyo wa Ukraine alikuwa akizungumza kutoka katika jengo la Orthodox la Kyiv Pechersk Lavra, ambapo Kanisa Kuu la Dormition liliharibiwa vibaya katika mashambulizi ya anga ya Urusi usiku wa Jumapili, Juni 14, kuamkia Jumatatu, Juni 15, ambayo yaliua watu watano katika mji mkuu na kumi na mmoja kote nchini.
Chanzo ndani ya ofisi ya rais wa Ukraine kiliwaambia waandishi wa habari, ikiwa ni pamoja na shirika la habari la AFP, kwamba ujumbe kama huo “uliwasilishwa muda fulani uliopita kupitia njia mbalimbali,” lakini kwamba “hakuna jibu dhahiri lililotolewa.”
Volodymyr Zelenskyy tayari alikuwa amependekeza mkutano na Vladimir Putin ili kujadili makubaliano ya kukomesha mgogoro huo, uliosababishwa na uvamizi kamili wa Urusi dhidi ya Ukraine mnamo Februari 2022. Rais wa Urusi alikataa, akisema angefikiria tu mkutano kama huo ili kusaini makubaliano ya mwisho.