Tanzania Prisons imejiweka katika nafasi nzuri ya kupambana kubaki Ligi Kuu Tanzania Bara baada ya kuibuka na ushindi wa mabao 2-1 dhidi ya Mtibwa Sugar katika mchezo uliopigwa Uwanja wa Sokoine, jijini Mbeya.
Mabao ya Prisons yalifungwa na Seleman Boban dakika ya 70 na Kelvin Sengati dakika ya 90, ushindi uliowapa pointi tatu muhimu katika vita vya kujiokoa na kushuka daraja.
Matokeo hayo yameifanya Prisons kupanda hadi nafasi ya 14 kwenye msimamo wa ligi ikiwa na pointi 29 baada ya mechi 29, huku Mtibwa Sugar ikishuka hadi nafasi ya 15 ikiwa na pointi 27 na kuingia kwenye hatari kubwa ya kushuka daraja.
Katika mchezo huo, mabadiliko yaliyofanywa na kocha wa Prisons kwa kumtoa Haruna Chanongo na kumuingiza Seleman Boban yalizaa matunda baada ya mshambuliaji huyo kufunga bao la kwanza na kuipa timu yake uhai mpya.
Licha ya ushindani mkubwa kutoka kwa pande zote mbili, Prisons ilionyesha utulivu na kutumia vyema nafasi ilizopata kuondoka na ushindi muhimu mbele ya mashabiki wake.
Mtibwa Sugar, ambayo ilirejea Ligi Kuu msimu huu baada ya kucheza Championship kwa msimu mmoja, imeendelea kuwa na rekodi mbaya katika mechi za ugenini.
Prisons ilianza kuongoza kupitia kwa Boban kabla ya Mtibwa Sugar kusawazisha dakika ya 89. Hata hivyo, furaha ya wageni haikudumu baada ya Kelvin Sengati kufunga bao la ushindi dakika ya 90 na kuwarejeshea matumaini Wajelajela hao.
Pamoja na ushindi huo, Prisons bado haijajihakikishia kubaki salama Ligi Kuu. Itahitaji ushindi katika mchezo wake wa mwisho dhidi ya Mashujaa ili kuepuka hatari ya kucheza mechi za mchujo (play-off).
Kwa upande wa Mtibwa Sugar, timu hiyo italazimika kushinda mchezo wake wa mwisho dhidi ya Namungo na kusubiri matokeo ya wapinzani wake ili kujua hatma yake.
Ofisa Habari wa Mtibwa Sugar, Thobias Kifaru, amesema matokeo hayo yamewaweka kwenye wakati mgumu, lakini bado wana matumaini ya kufanya vizuri katika mchezo wa mwisho.
“Mchezo ulikuwa mzuri na tulitawala kipindi cha kwanza. Tutaenda kupambana kwenye mechi ya mwisho, japokuwa matokeo haya si mazuri kwetu. Ligi imekuwa ngumu, na kilichobaki ni kumuomba Mungu atupe matokeo mazuri,” alisema Kifaru.
Naye Kocha Mkuu wa Tanzania Prisons, Shedrack Nsajigwa, amewapongeza wachezaji wake kwa kupambana na kupata ushindi muhimu, huku akisisitiza kuwa kazi bado haijaisha.
“Mchezo haukuwa rahisi kwa sababu kila timu ilihitaji ushindi. Nawapongeza wachezaji wangu kwa kujituma, lakini sasa tunapaswa kujipanga vizuri kwa mchezo wa mwisho dhidi ya Mashujaa, ambao nao ni muhimu sana,” amesema Nsajigwa.
Prisons itamaliza msimu ugenini dhidi ya Mashujaa ikihitaji pointi tatu ili kujihakikishia kubaki Ligi Kuu, wakati Mtibwa Sugar itakuwa ikisaka ushindi dhidi ya Namungo huku ikisubiri matokeo ya viwanja vingine ili kujua hatma yake.