Monterrey, Marekani. Timu ya taifa ya Morocco imekuwa ya kwanza kutoka Afrika kutinga hatua ya 16 bora ya fainali za Kombe la Dunia 2026 kufuatia kuing’oa Uholanzi kwa penalti 3-2 baada ya sare ya bao 1-1 ndani ya dakika 120 za mchezo huo uliochezwa alfajiri ya leo, Jumanne, mjini Monterrey.
Mchezo huo ulianza kwa tahadhari kwa pande zote mbili, kila timu ikijaribu kupima uimara wa mwenzake kabla ya kushambuliana.
Kipindi cha kwanza kilishuhudia nafasi chache za wazi huku safu za ulinzi za timu zote zikionekana kuwa imara zaidi.
Kipindi cha pili kilileta msisimko mkubwa baada ya Uholanzi kupata bao kupitia Cody Gakpo dakika ya 71.
Bao hilo liliwapa Uholanzi matumaini ya kusonga mbele, huku Morocco ikilazimika kuongeza presha zaidi kwenye lango la wapinzani wao.
Jitihada hizo zilizaa matunda katika dakika majeruhi kupitia nyota wa Fulham, Issa Diop, aliyesawazisha na kuamsha matumaini mapya kwa Simba wa Atlas.
Dakika 30 za ziada hazikutosha kumpata mshindi, hivyo mchezo ukaamuliwa kwa mikwaju ya penalti.
Katika changamoto hiyo, Morocco ilianza kwa presha baada ya El Aynaoui kukosa penalti ya kwanza, lakini Rahimi na Talbi walifunga kwa utulivu mkubwa.
Uholanzi nao walijibu kupitia Koopmeiners na Weghorst waliopachika penalti zao, lakini makosa ya Kluivert, Timber na Summerville yaliigharimu timu yao.
Morocco pia iliingia katika presha baada ya Achraf Hakimi kukosa penalti, lakini Saibari alihitimisha kazi kwa kufunga penalti ya mwisho iliyowapa ushindi wa 3-2.