Polisi wa Ethiopia wametangaza kukamatwa kwa wasafirishaji haramu 17 wiki hii. Wanaume hao wanashutumiwa kwa biashara haramu ya binadamu, wizi, na ubakaji. Inaaminika kundi hilo la wasafirishaji haramu lilisafirisha maelfu ya wahamiaji kupitia Djibouti na Yemen hadi Saudi Arabia na kuwanyang’anya karibu euro milioni tano.
Imechapishwa: Imehaririwa:
Dakika 1 Wakati wa kusoma
Matangazo ya kibiashara
Kulingana na wachunguzi, kiongozi wa mtandao huo ni Mohammed Tahir Aden, anayejulikana kama “Woodi,” mtu maarufu miongoni mwa wahamiaji wa Ethiopia. Wanaume hao 17 wanadaiwa kufanya kazi chini ya amri yake na kuchukua jukumu kuu katika operesheni hiyo. Inaaminika kuwa waliwasafirisha watu zaidi ya 40,000 kwenda Saudi Arabia kimagendo na pia wanahusishwa na vifo vya wahamiaji zaidi ya 60. Wanashutumiwa kwa kuwanyang’anya euro milioni tano waathiriwa wao.
Wanashutumiwa kwa kuwatesa waathiriwa wao katika maghala nchini Yemen ili kuwanyang’anya pesa kutoka kwa familia zao. Katika miezi ya hivi karibuni, mamlaka imeongeza kasi katika operesheni ya kukamatwa kwa wafanyabiashara haramu wa binadamu. Kwa mwaka uliopita, idara ya uchunguzi ya Ethiopia imelenga zaidi mtiririko wa kifedha wa wafanyabiashara haramu na inatafuta kuvunja mitandao yote. Huu ni uchunguzi wa nne mkubwa uliotangazwa na mamlaka tangu mwanzo wa mwaka.
Mnamo mwezi Januari, watu 22 walikamatwa kwa kuwasafirisha wahamiaji 1,800 kwenda Libya kimagendo. Mnamo mwezi Aprili, mtandao mwingine ulishutumiwa kwa kuwasafirisha zaidi ya watu 3,000 hadi sehemu moja. Mamlaka inasema imeimarisha ushirikiano wao na Wizara ya Sheria, idara ya ujasusi, na washirika kadhaa wa kigeni ili kuvunja mitandao hii ya kimataifa.