Dar es Salaam. Katibu Mkuu wa Wizara ya Habari, Sanaa, Utamaduni na Michezo na Msemaji Mkuu wa Serikali, Gerson Msigwa amesema kuwa Simba na Yanga zitaendelea kuutumia Uwanja wa Benjamin Mkapa, Dar es Salaam kwa mechi za kimataifa na mchezo baina yao ingawa haziruhusiwi kuutumia kwa mechi nyingine za Ligi Kuu Tanzania Bara na mashindano mengine ya ndani.
Msigwa amesema kuwa lengo la kupunguza matumizi ya Uwanja wa Benjamin Mkapa ni kuutunza na kutouchosha.
“Hatujatangaza kuufunga Uwanja wa Benjamin Mkapa kwa miezi 6 kama baadhi ya watu wanavyopotosha.
“Tumekaa na TFF na pia timu za Yanga na Simba zilioomba kutumia uwanja wa Benjamin Mkapa kwa ajili ya mechi za ligi na kufanya tathmini ya uharibifu wa sehemu ya kuchezea (pitch) ya uwanja wa Benjamin Mkapa baada ya mechi mfululizo zilizopita za Kimataifa na za ligi.
“Tumekubaliana kuwa Yanga na Simba watafute viwanja vingine kwa ajili ya michezo ya ligi na uwanja wa Benjamin Mkapa ubaki kwa ajili ya mechi za Kimataifa, Timu ya Taifa na Dabi mpaka hapo tutakapofanya ukarabati mkubwa wa pitch,” amesema Msigwa.
Msigwa amesema kuwa kiasi cha Sh31 bilioni kilichotumika kufanya ukarabati wa Uwanja wa huo kimetumika vyema katika kuhakikisha uwanja huo unakuwa wa hadhi ya juu.
“Wale wanaohoji Bilioni 31 zilizotumika kukarabati uwanja, ni hivi ukarabati huo haukuhusisha ukarabati wa pitch. Ulihusisha kuboresha jengo, kuweka mifumo mipya ya umeme na taa, maji, vyoo, njia ya kukimbilia, kuweka viti vyote 62,000, kuweka viyoyozi, mfumo wa sauti, ubao wa matangazo, mabenchi ya ufundi, magoli, kupaka rangi na mfumo wa sauti.
“Pia ni vizuri pia kujua kuwa uwanja mkubwa kama Benjamin Mkapa kila unapotumika ni lazima ufuatiwe na marekebisho kwa sababu hakuna tukio linaloweza kufanya bila kusababisha uharibifu. Na hii sio kwa uwanja huu tu ni viwanja vyote Dunia, na ukarabati wake unahitaji utaalamu na sio kubondabonda,” amesema Msigwa.