England. Nahodha wa zamani wa Chelsea na timu ya taifa ya England, John Terry, 44, kwa sasa unaweza kusema bahari imetulia upande wa ndoa yake na mkewe Toni, 44, baada ya dhoruba kali iliyofanya uhusiano wao kukalia kuti kavu.
Wawili hao walikutana kwa mara ya kwanza kipindi Terry yupo katika akademi ya Chelsea, ingawa Toni hakuwa na habari kuwa mumewe mtarajiwa ni mchezaji hadi alipoanza kumuona kwenye televisheni.
“Ndani ya muda mfupi tulielewana, alikuwa mvulana mzuri sana. Sikuwa na wazo kabisa kuwa alikuwa mchezaji wa mpira hadi pale nilipoanza kumuona kwenye TV,” anasema Toni na kuongeza:
“Tulianza kwenda kupata chakula cha jioni pamoja kwenye mgahawa. Mara nyingi nilikuwa nalipa kwa sababu hakuwa na fedha nyingi. Nakumbuka alikuwa anakuja kunichukua kwa gari lake dogo la bluu aina ya Citroen Saxo. Maisha yalikuwa rahisi.”
Terry aliyejiunga na Chelsea 1995, kisha 1998 akapanda timu ya wakubwa alipocheza hadi 2017, kwa mujibu wa Toni, kipindi cha awali cha uhusiano wao kijana huyo alijitoa sana hadi kumpikia chakula na kuletea maua na kadi.
Uhusiano wao uliendelea kukua na kuimarika na hatimaye kufikia Juni 2007 wakafunga ndoa katika harusi ya kifahari iliyofanyika Blenheim Palace ndani ya jumba la kifalme lililopo Woodstock, Oxfordshire nchini Uingereza. Hata hiyo, mwaka mmoja kabla ya ndoa yaani Mei 18, 2006 walijaliwa kupata watoto pacha mtoto wa kike na wa kiume waliowapa majina ya Summer Rose na Georgie John ambao kwa sasa wana umri wa miaka 19.
Toni anasema haikuwa rahisi kupata watoto kwa sababu alikuwa na changamoto ya uzazi ambayo alipambana nayo kwa muda wa miaka mitatu na hatimaye kiu yake ya muda mrefu ikajibiwa kwa kupata pacha.
“Hali ilikuwa ngumu kuliko tulivyotarajia kwa sababu nilikuwa nimepata tatizo la ovari kuwa na uvimbe ambalo linaweza kuathiri uzazi. Kilikuwa kipindi kigumu sana na tulikuwa na mazungumzo ya wazi kuhusu ukweli kuwa huenda tusingeweza kupata watoto kabisa,” anasema Toni.
“Baada ya miaka mitatu tiba fulani ya uzazi ilisababisha nipate ujauzito. Tulifurahi sana na wiki sita baadaye tuligundua nilikuwa na ujauzito wa pacha. Terry alifurahi kupita kiasi na alianza kutabasamu kulikuwa na machozi ya furaha.”
Toni anadai kuwa baada ya kujifungua alichukia picha zake alizopiga akiwa na wake wengine wa wachezaji, hiyo ni kwa sababu alihisi mwili wake umeongezeka hivyo alihitaji kufanya mazoezi ili kupungua.
“Nilichukua picha zote na kuziangalia kila mtu alionekana kuvutia isipokuwa mimi. Nilihisi nilipaswa kujihurumia zaidi na shinikizo lilikuwa kubwa. Hilo ndilo lililonisukuma kubadilisha mwili wangu kabisa kupitia mazoezi,” anasema.
Toni aliamua kuingia kwa nguvu katika ulimwengu wa mazoezi hadi leo ukurasa wake wa Instagram umejaa picha na video zake akifanya mazoezi akionyesha misuli ya tumbo iliyochongwa vizuri.
Kwa sasa familia hiyo inaishi kwenye jumba la kifahari huko Sussex, mtaa wa kishua unaopendwa na mastaa wengi. Nyumba yao yenye thamani ya Pauni 4.3 milioni ikiwa kwenye eneo la ekari nane ina bwawa la kuogelea, maktaba, eneo la kutunza farasi, uwanja wa tenisi na kadhalika.
Toni alikuwa miongoni mwa wake wa mastaa wa soka waliogonga vichwa vya habari katika fainali za Kombe la Dunia 2006 huko Ujerumani akiwa pamoja na rafiki zake kama Coleen Rooney, Cheryl Cole na Alex Gerrard. Hata hivyo, sasa wakianza safari ya kuzeeka pamoja ndoa yao imepitia changamoto nyingi kama uzazi wa kuchelewa, lakini kubwa zaidi ni ukosefu wa uaminifu kwa Terry dhidi ya ndoa.
Mwaka 2009, dunia ya michezo ilitikisika baada ya kuripotiwa kuwa Terry alikuwa amemsaliti Toni kwa kutoka na Vanessa Perroncel, mpenzi wa rafiki yake Wayne Bridge ambaye ni mwanamitindo kutokea Ufaransa. Kufuatia kashfa hiyo, Toni alikimbilia Dubai na watoto ili kuepuka kuandamwa na vyombo vya habari. Huko alipiga picha kwenye fukwe akiwa amevaa ‘kivazi fulani’ ili kumuonyesha mumewe kile alichokuwa anakosa.
Ili kuzima sakata hilo, Chelsea ilitoa ruhusa maalumu kwa Terry kwenda Dubai kujaribu kuokoa ndoa. Katika mazungumzo ya simu, Terry alimwambia Toni kuwa ni lazima mambo yabadilike – anataka ndoa iendelee kuwepo.
Terry na Wayne walikuwa marafiki wa karibu kwa muda mrefu kabla ya kashfa hiyo. Waliwahi kuwa majirani katika mtaa wa kishua huko Surrey. Walichezea pamoja Chelsea kwa miaka mitano kabla ya Wayne kuhamia Manchester City 2008.
Ingawa Vanessa alikanusha madai hayo na gazeti lililochapisha habari hiyo kuomba radhi, Wayne alikataa kumpa Terry mkono kabla ya mechi kati ya Manchester City na Chelsea 2010. Kutokana na sekeseke hilo, Terry aliondolewa unahodha wa timu ya taifa ya England na kocha wa wakati huo, Fabio Capello, ingawa baadaye alirudishwa katika nafasi hiyo.
Hiyo haikuwa mara ya kwanza kwa Toni kudhalilishwa hadharani kwa sababu ya tuhuma za mumewe. Kabla ya harusi, Terry alishakabiliwa na tuhuma za kutoka na wanawake takriban wanne. Baadaye alikiri kumsaliti Toni na kuahidi kubadilika.
Ikiwa ni miaka zaidi ya 15 baada ya dhoruba hiyo, Toni ameendelea kusalia katika ndoa na Terry huku akifanikisha kujenga taswira mpya ambayo ni tofauti kabisa na ile ya zamani kwa upande wa urembo na mtindo wa maisha ya kisasa.
Kwa sasa Toni anajulikana na wengi kama mpanda farasi kwenye mashindano ya dressage, na pia mshawishi katika mitandaoni anayehamasisha mazoezi ya mwili. Hivyo ni wazi ameamua kusonga mbele licha ya kuumiza kisakolojia na kashfa za mumewe.