Dar es Salaam. Ni wazi kuwa Nikki Mbishi ni mmoja wa wasanii maarufu wa hip hop kutoka Tanzania ambapo wengi wanamuheshimisha sana kwa uwezo wake wa kuchana, uandishi wa mashairi yenye maudhui mazito na uchambuzi wa masuala ya kijamii.
Tangu alipovuma na albamu yake ya kwanza, Sauti ya Jogoo (2011) chini ya M Lab (Music Laboratory), Nikki Mbishi ameendelea kujipambanua kama mwanamuziki mwenye akili ya ziada (conscious rapper). Fahamu zaidi.
1 Pengine Nikki Mbishi ndiye rapa pekee Bongo wa kizazi hiki (2010 – 2025) aliyejipachika a.k.a nyingi zaidi. Miongoni mwa hizo, ni Baba Malcom, Babu Bomba, Dr. Unju, Zohan, Juke Box, Otingo Taniboy, Telabyte na Sam Magoli.
2. Wakati anaanza muziki alikuwa akijiita Nikki Jay, lakini baadaye kutokana na ukuaji wa kisanaa na mitazamo yake kuhusu tasnia, ndipo akajipa jina la Nikki Mbishi ambalo hadi sasa linasimama kama chapa yake.
3. Katika shindano la Kilimanjaro Emcee Shujaa 2008, Nikki Mbishi alikuwa mshindi wa pili, Lusajo wa kwanza na Godzilla wa wa tatu. Hiyo ni baada ya Nikki na Zilla kushindwa kufua dafu kwenye shindano la Sprite Emcee Africa lililoandaliwa na Channel O.
4. Katika wimbo wa Nikki Mbishi, Kila Siku (2011), Godzilla ambaye alishirikishwa katika vesi yake amechukua melodi ya rap kutoka kwenye wimbo wa Jay Z, Kanye West na Rihanna, Run This Town (2009).
Ikumbukwe Run This Town sio wimbo maarufu tu, bali wenye mafanikio makubwa ukishika nafasi ya pili chati ya Billboard Hot 100, huku ukishinda tuzo mbili za Grammy – Wimbo Bora wa Rap na Wimbo Bora wa Kushirikiana.
5. Mwimbaji wa RnB, Rama Dee ndiye alitakiwa kusikika kwenye kiitikio cha wimbo wa Nikki Mbishi, Punchline (2011) badala ya Grace Matata ambaye amesikika pia kwenye ngoma nyingine ya Nikki, Nyakati za Mashaka (2011).
6. Katika ngoma ya Nyakati za Mashaka (2011) ya Nikki Mbishi aliyoimba Grace Matata ni sehemu ya wimbo wake ‘Nyakati’ uliobeba jina la albamu yake ya kwanza iliyotoka mwaka 2013 ikitayarishwa na Duke Tachez, Willie HD, Mujwahuki na kadhalika.
Ikumbukwe Nyakati yake Grace Matata ni albamu ya tano kutoka chini ya M Lab baada ya Maboma ya Ben Pol, Sauti ya Jogoo ya Nikki Mbishi, Soga za Mzawa ya One The Incredible na African Son ya Stereo.
7. Nikki Mbishi, mkali wa kibao Play Boy (2011), ndiye msanii wa kwanza hapa Bongo kufanya kazi na Khaligraph Jones kutokea Kenya. Ni katika kolabo yao, Baba Yao (2014).
8. Baada ya Nikki Mbishi ndipo wakafuata wasanii wengine kama Rayvanny, Rosa Ree, Young Killer, Chin Bees, Harmonize, Alikiba, Ommy Dimpoz, Stereo, Country Wizzy, Rostam (Roma na Stamina), Christian Bella, Conboy, Young Lunya, Nandy, Kusah na kadhalika.
9. Tangu mwaka 2010 hadi 2025, Nikki Mbishi ndiye msanii Bongo aliyetoa albamu nyingi zaidi Sauti ya Jogoo (2011), Malcom XI (2013), Ufunuo wa Unju Bin Unuq (2015), Sam Magoli (2018), Welcome to Gamboshi (2022), K.I.G.U (2024), Shairika Kibishi (2024), Katiba Mpya (2024), Spana za Unju (2024) na Plata O Plomo (2025).
10. Hadi sasa wasanii wa muziki huo waliotoa albamu nyingi ni Mr II Sugu (10), Nikki Mbishi (10), Lady Jaydee (9), Soggy Doggy (5), Juma Nature (5) Harmonize (5), Professor Jay (4), pamoja na Mh. Temba (3), Fid Q (3), Diamond Platnumz (3), Alikiba (3), Barnaba (3), Navy Kenzo (3) na kadhalika.