Jeshi la Nigeria limetangaza Alhamisi, Oktoba 23, 2025, kwamba limewaua wanajihadi 50 wakati wa operesheni za anga na ardhini katika majimbo ya kaskazini ya Borno na Yobe. Hili ni jibu la mashambulizi yaliyoratibiwa na wapiganaji wa Islamic State in West Africa (Iswap) kwenye kambi za kijeshi zilizopo katika majimbo haya mawili.
Imechapishwa:
Dakika 2 Wakati wa kusoma
Matangazo ya kibiashara
Jeshi la Nigeria limetangaza kwamba limewaua takriban wapiganaji hamsini wa Kiislamu siku ya Alhamisi, Oktoba 23, wakati wa mapigano kaskazini mashariki mwa nchi, kitovu cha uasi wa Kiislamu ambao umeendelea tangu mwaka 2009. Wanajihadi walifanya mashambulizi kadhaa ya wakati mmoja dhidi ya kambi kadhaa za kijeshi kwa kutumia ndege zisizo na rubani zenye silaha.
Kulingana na msemaji wa operesheni ya kukabiliana na uasi ya jeshi la Nigeria, Luteni Kanali Sani Uba, mashambulizi hayo yalilenga kambi za kijeshi katika miji ya Dikwa, Mafa, na Gajibo (Jimbo la Borno), pamoja na Katarko, katika Jimbo jirani la Yobe, usiku kucha kati ya Jumatano na Alhamisi. Mapigano hayo, yaliyotokea kati ya usiku wa manane na saa 9 usiku, yalihusisha wanajeshi wa ardhini wakiungwa mkono na vikosi vya anga.
“Operesheni za pamoja za ardhini na anga ziliwaangamiza zaidi ya magaidi 50 katika maeneo yote,” amesema Luteni Kanali Uba. Ameongeza kuwa silaha nzito, ikiwa ni pamoja na bunduki za kushambulia za Kalashnikov, bunduki za mashine, na vifyatuaji roketi, zilikamatwa, na kwamba wanajeshi kadhaa walijeruhiwa, ingawa hakuna idadi kamili ya vifo iliyotolewa. Operesheni za ardhini na angani zinaendelea ili kuwapata “zaidi ya wanajihadi 70 waliojeruhiwa,” ameongeza.
Usiku wa mapigano makali
Video zilizorushwa kwenye mitandao ya kijamii zinaonyesha wanajeshi wakipiga picha mbele ya miili ya wanajihadi waliouawa. shirika la habari la AFP limesema haliwezi kuthibitisha picha hizi kwa uhuru.
“Magari na majengo yaliharibiwa kwa moto kutoka kwa ndege zisizo na rubani za magaidi na mabomu yaliyorushwa silaha aina ya RPG, haswa huko Mafa na Dikwa, ambapo ulinzi ulivunjwa kwa muda,” amesema Sani Uba. “Baadhi ya wanajeshi walijeruhiwa katika mapigano hayo, lakini hali yao iko sawa,” ameongeza.
Vyanzo viwili vya usalama vimebainisha kwamba waasi hao walikuwa wamejaribu kuzuia kuwasili kwa vikosi vya kijeshi, lakini walilazimika kurudi nyuma baada ya kuwasili kwa ndege za kivita za jeshi.