Wengi wa nchi wanachama 193 wa Umoja wa Mataifa kwa mara nyingine wameisihi Marekani iondoe hatua hizo licha ya mabadiliko yanayoonekana katika baadhi ya nchi ambazo zimeamua aidha kujizuia kupiga kura au kuunga mkono Marekani.
Azimio hilo lenye kichwa “Uhitaji wa kukomesha vikwazo vya kiuchumi, kibiashara na kifedha vilivyowekwa na Marekani dhidi ya Cuba” limeidhinishwa kwa kura 165 za ndio, saba za hapana, na kura 12 za kujizuia.
Mwaka uliopita, pendekezo hilo lilikubaliwa kwa kura 187 za ndio, mbili za hapana (Marekani na Israel), na moja ya kujizuia (Moldova).
Waliopiga kura kupinga azimio hilo mwaka huu ni Marekani, Israel, Argentina, Hungary, Paraguay, Macedonia Kaskazini, na Ukraine.
Kura 12 za kujizuia zimepigwa na Albania, Bosnia na Herzegovina, Costa Rica, Czechia, Ecuador, Estonia, Latvia, Lithuania, Morocco, Poland, Moldova na Romania.
Uungaji mkono wa Cuba kwa uvamizi wa Urusi wasababisha lawama
Poland ikizungumza pia kwa niaba ya Czechia, Estonia, Latvia na Lithuania imeelezakuwa uamuzi wake wa kujizuia unaonesha “utumiaji wa kuchagua wa Mkataba wa Umoja wa Mataifa,” ikitaja uungaji mkono wa Cuba kwa Urusi katika uvamizi wake wa Ukraine unaoendelea, ambapo raia wa Cuba wameripotiwa kupigana upande wa Moscow.
Romania pia imeeleza suala hilo ikisema ingawa kwa muda mrefu umekuwa ukiunga mkono azimio hilo, “ushiriki wa kigeni katika vita haramu vya uvamizi ni ukiukaji mkubwa wa Mkataba wa Umoja wa Mataifa na sheria za kimataifa,” na ikaitaka Cuba kuacha kuunga mkono uvamizi huo.
Ingawa azimio hilo si la lazima kisheria, kupitishwa kwake kunabaki kuwa ishara ya upinzani wa jumuiya ya kimataifa dhidi ya hatua za upande mmoja za kulazimisha zenye athari nje ya mipaka.
Azimio lenyewe
Maandishi ya azimio hilo yanasisitiza wito wa muda mrefu wa Mkutano Mkuu kwa nchi zote kukataa sheria za adhabu za Marekani kama Sheria ya Helms-Burton ya mwaka 1996, ambayo Cuba na nchi nyingine zinasema inakiuka sheria za kimataifa na Mkataba wa Umoja wa Mataifa.
Mkutano Mkuu pia umetaja hatua zilizochukuliwa na Rais wa Marekani Barack Obama mwaka 2015 na 2016 kurekebisha baadhi ya vipengele vya vikwazo hivyo, “ambavyo vinatofautiana na hatua zilizotekelezwa tangu mwaka 2017 chini ya utawala wa kwanza wa Donald Trump ambazo zililenga kuimarisha utekelezaji wake.”
Kupitia azimio hilo, Baraza Kuu pia limeamua tena kujumuisha maandiko ya vikwazo hivyo katika ajenda ya muda ya kikao cha mwaka ujao.