Katika ujumbe wa video, Katibu Mkuu wa Umoja wa Mataifa Antonio Guterres ametoa wito kwa jumuiya ya kimataifa kutoa msaada zaidi kwa nchi hiyo, ambako zaidi ya watu milioni 21 wanahitaji msaada ili kuendelea kuishi.
Viongozi wa Afrika, wafadhili wa kimataifa, na maafisa wa mashirika ya Umoja wa Mataifa wamekutana Paris wakilenga kukomesha mzunguko wa vurugu na njaa unaolikumba eneo la Maziwa Makuu. Lengo la mkutano huu, ulioandaliwa kwa ushirikiano kati ya Ufaransa na Togo, lilikuwa ni kukusanya mamia ya mamilioni ya euro kukabiliana na janga la kibinadamu linalozidi kuwa baya, hata wakati ambapo misaada ya kimataifa — hasa kutoka Marekani — inapungua.
Katika ujumbe wake uliotangazwa kwa hafla hiyo, António Guterres ameweka mgogoro huo katika muktadha wa muda mrefu: “Kwa miongo mitatu, watu wa Jamhuri ya Kidemokrasia ya Congo wamevumilia mzunguko usioisha wa vurugu, ukimbizi na mateso. Leo, hali ya kibinadamu ni miongoni mwa mbaya zaidi duniani.”
Nchi iliyopasuliwa na mashambulizi ya M23
Onyo la Katibu Mkuu wa Umoja wa Mataifa linakuja wakati mashariki mwa DRC ikiendelea kushambuliwa tangu mwanzoni mwa mwaka na kundi la waasi la Machi 23 (M23), linalojitambulisha kama mtetezi wa maslahi ya wachache wa Kitutsi wa Congo. Kulingana na ripoti za Umoja wa Mataifa, waasi hawa wanapata msaada kutoka jeshi la Rwanda, na wamefanikiwa kuteka maeneo makubwa katika majimbo ya Kivu Kaskazini na Kivu Kusini, yakiwemo miji mikuu ya Goma na Bukavu.
Mapigano hayo yamesababisha wimbi jipya la watu kukimbia makazi yao, yamekatiza njia za biashara, na yamelazimisha mamia ya maelfu ya watu kukimbilia usalama. “Mwaka huu pekee, vurugu za kivita zimeua mamia na kujeruhi maelfu. Zaidi ya watu milioni 21 wanahitaji msaada wa kibinadamu, watu milioni 5.7 wamekimbia makazi yao, na zaidi ya milioni 27 wanakabiliwa na uhaba wa chakula,” amesema Guterres.
Katika maeneo yenye mapigano, huduma muhimu zimeporomoka: shule, hospitali, na mifumo ya maji na usafi wa mazingira. Ugonjwa wa kipindupindu unarudi tena, ukatili wa kingono unaongezeka, na familia zinakimbia vita vinavyoonekana kutokuwa na mwisho.
Utoto katika mstari wa mbele
Katika taarifa iliyotolewa na UNICEF leo jijini Paris Ufaransa na Kinshasa, DRC, imechora taswira ya kushtua sawa na hiyo. “Leo, zaidi ya watoto milioni 12 katika DRC, Uganda na Burundi wanategemea msaada wa kibinadamu ili tu kuendelea kuishi,” ameonya Gilles Fagninou, Mkurugenzi wa Kanda wa shirika hilo kwa Afrika Magharibi na Kati.
Nchini DRC pekee, karibu shule 1,200 zimeharibiwa au kubadilishwa kuwa makazi ya wakimbizi wa ndani, na watoto milioni 1.6 wameacha shule, wakiwa wazi kwa hatari ya unyonyaji na kulazimishwa kujiunga na makundi ya waasi. Magonjwa yameanza kurudi tena, na utapiamlo unaongezeka kwa kasi kubwa. Mwaka 2024, nchi hiyo ilirekodi zaidi ya ukiukaji mkubwa 4,000 dhidi ya watoto idadi ya pili kwa ukubwa duniani. Miongoni mwa ukiukaji huo, ukatili wa kingono umesambaa: watoto wanachangia zaidi ya asilimia 40 ya karibu visa 10,000 vilivyoripotiwa katika nusu ya kwanza ya mwaka 2025.
“Hii si dharura ya kibinadamu pekee: ni janga la haki za watoto. Kuwalinda watoto lazima kubaki dira ya kimaadili ya pamoja. Mustakabali wa eneo hili unategemea hilo,” amesisitiza Bwana Fagninou.