Kesi ya Jamil Mukulu, kiongozi wa kihistoria wa ADF, inatarajiwa kuanza tena Novemba 17, miaka kumi baada ya kukamatwa kwake nchini Tanzania mwaka wa 2015 na kupelekwa nchini Uganda. Kiongozi huyo wa waasi anashtakiwa kwa “ugaidi,” “mauaji,” na “uhalifu dhidi ya ubinadamu” mbele ya Kitengo cha Uhalifu wa Kimataifa cha Mahakama Kuu huko Kampala. Kundi la waasi wa Uganda la ADF, lililoundwa miaka ya 1990, sasa linaendesha harakati zake hasa mashariki mwa DRC.
Imechapishwa:
Dakika 1 Wakati wa kusoma
Matangazo ya kibiashara
Na mwandishi wetu maalum huko Kampala, Lucie Mouillaud
Hii ni kesi inayotarajiwa sana, iliyopangwa kuanza mwezi Oktoba 2025 nchini Uganda, lakini ilisitishwa haraka kutokana na masuala ya tafsiri. Miaka kumi baada ya kukamatwa kwa Jamil Mukulu, maendeleo ya kesi ni afueni kwa waathiriwa, kulingana na mmoja wa mawakili wao, Sarah Awelo.
“Kwa waathiriwa, huu ni mwanga unaoanza kutolewa,” amesema. “Wamesubiri kwa muda mrefu kusikilizwa na wana matumaini na mahakama. Lakini kesi hii si ya Uganda pekee; pia inatuma ujumbe kwa waasi kwamba siku moja watalazimika kujibu makosa yote waliyoyatenda.”
Jamil Mukulu na washtakiwa wenzake zaidi ya ishirini wanashtakiwa kwa mauaji yaliyofanywa nchini Uganda, haswa dhidi ya viongozi wa kidini wa Kiislamu, na kwa baadhi ya mashambulizi yaliyohusishwa na ADF kati ya mwishoni mwa miaka ya 1990 na 2015.
Mawakili wa Jamil Mukulu wanalaani kuzuiliwa kwake kwa muda mrefu kabla ya kesi.
Hassan Ndugwa, mwanzilishi wa Chama cha Waathiriwa wa Ugaidi nchini Uganda, amebainisha: “Ni jambo zuri kumuona Jamil Mukulu mahakamani. Lakini mashambulizi haya ya kigaidi ni ya kisiasa, ndiyo maana usaidizi na utambuzi lazima uende zaidi ya kesi.” Kuna haja ya kupata fidia ya muda mrefu, kuundwa kwa mfuko wa fidia na ukarabati. Utambuzi wa waathiriwa ni muhimu sana.
Rufaa kadhaa za upande wa utetezi za kusitisha kesi zimekataliwa kwa miaka mingi, huku mawakili wa Jamil Mukulu wakishutumu kifungo cha muda mrefu cha mteja wao kabla ya kesi na kesi za unyanyasaji gerezani.