Mkutano huo wa kilele kuhusu Uhuru wa Kidijitali barani Ulaya, unafanyika Jumanne mjini Berlin, Ujerumani na unatarajiwa kuhudhuriwa na nchi 23, pamoja na mawaziri wa masuala ya kidijitali wa nchi za Umoja wa Ulaya na viongozi wa wafanyabiashara.
Merz na Macron ndiyo watakuwa wazungumzaji wakuu na watashinikiza uhuru mkubwa wa kidijitali wa Ulaya, wakati ambapo matumizi ya Akili Mnemba yakiongezeka.
Duru kutoka Berlin zimeeleza kuwa matangazo kadhaa kuhusu ushirikiano na uwekezaji wa makampuni ya Ujerumani na Ufaransa yanatarajiwa kutolewa, ambapo yatahusisha miundombinu ya kompyuta, teknolojia ya kiwango cha juu, huduma za afya, ulinzi na droni.
Upatikanaji wa rasilimali za kompyuta
Lengo kuu la mkutano huo litakuwa kuhusu upatikanaji wa rasilimali za kompyuta, na jinsi Ulaya inaweza kutengeneza miundombinu yake salama ya kuhifadhi data za serikali na makampuni.
Kwa sasa makampuni makubwa ya Marekani kama vile Amazon, Microsoft na Google, ndiyo yanatawala katika soko la upatikanaji wa rasilimali za kompyuta. Umoja wa Ulaya umekuwa ukikosolewa kwa kutochukua hatua haraka katika vita vya utawala wa Akili Mnemba dhidi ya Marekani na China.
Akizungumza Jumatatu kabla ya mkutano huo, Kansela Merz alitoa wito wa kuwepo uhuru mkubwa barani Ulaya. ”Tunahitaji kuwa huru zaidi, katika nyanja mbalimbali za kisiasa na kiuchumi. Hatuwezi tena kuitegemea Marekani kutulinda au China kutupatia malighafi,” alifafanua Merz.
Viongozi hao kutoka nchi zinazoongoza kwa uchumi mkubwa barani Ulaya, watatoa wito kwa Ulaya kuchukua udhibiti mkubwa wa hatma yake ya kidijitali. Wasiwasi kuhusu makampuni makubwa ya teknolojia ya Marekani kutawala umeongezeka tangu Rais Donald Trump aliporejea madarakani, ambaye pia amekuwa akitilia shaka uhusiano wa muda mrefu kati ya bara la Ulaya na Marekani katika maeneo mengi.
Waziri wa Masuala ya kidijitali wa Ujerumani, Karsten Wildberger amesema kuwa ”ujumbe mkuu” wa mkutano huo utakuwa kwamba Ulaya iko tayari kuandaa mustakabali wake wa kidijitali ili kupunguza utegemezi. Kulingana na Wildberger, Ulaya inaweza kupata maendeleo bora kwa kufanya kazi pamoja.
Matumizi ya programu serikalini
Biashara za Ufaransa na Ujerumani ambazo zimekuwa zikijitahidi kufikia malengo na makampuni makubwa ya teknolojia ya Marekani, zimelalamikia kuhusu kanuni za kidijitali, ingawa Umoja wa Ulaya sasa unashutumiwa kwa kuweka ushindani kabla ya faragha ya raia.
Mkutano huo utakaohudhuriwa na wakurugenzi wakuu wa makampuni makubwa ya kikanda ikiwemo kampuni ya Akili Mnemba, Mistral ya Ufaransa, na kampuni kubwa ya programu ya Ujerumani ya SAP, pia utazungumzia matumizi ya programu katika mashirika ya serikali na utumishi wa umma.
Licha ya kuwepo mvutano kati ya Marekani na Ulaya, afisa mwandamizi kutoka Ofisi ya Rais wa Ufaransa, amesema mkutano huo hautokuwa kuhusu majibizano na Marekani au hata China. Amesema badala yake utaangazia zaidi jinsi ya kulinda uhuru wao mkuu na kuangalia sheria gani zinahitajika kuwekwa, hasa katika ngazi ya Ulaya.
(DPA, AFP)