Guterres amesema ushirikiano wa mataifa hayo ya Sahel utasaidia pia kukabiliana na changamoto za kisiasa zinazoongezeka katika ukanda ulioathiriwa na mapinduzi na ukosefu wa imani.
Katibu Mkuu huyo wa Umoja wa Mataifa ameongeza kuwa ni muhimu kujenga jukwaa la ushirikiano kati ya vyombo vya ujasusi na usalama vya ECOWAS, Muungano wa nchi za ukanda wa Sahel – Alliance of Sahel States, Mauritania, Chad na Algeria ili kuruhusu hatua za pamoja dhidi ya ugaidi.
Mashambulizi ya wanajihadi na makundi mengine yenye silaha, yameongezeka maradufu tangu mwaka 2019 na sasa yanaenea katika eneo lenye ukubwa mara mbili ya Hispania, huku hadi sasa watu 77,000 wakiwa wameumwa.
Makundi yanayohusiana na Al-Qaeda, hususan Jama’at Nusrat al-Islam wal-Muslimin, na Islamic State sasa yanashambulia karibu maeneo yote ya Mali na Burkina Faso, kutoka Niger Magharibi hadi mpaka wa Senegal. Kundi la Jama’at Nusrat al-Islam wal-Muslimin limeongeza ushawishi wake nchini Mali, ikiwemo kuzuia usambazaji wa mafuta na kuathiri uchumi wa taifa hilo.
Tofauti za kisiasa ni kikwazo katika kudhibiti ugaidi
Antonio Guterres amekiri kuwa tofauti za kisiasa zimekuwa kikwazo kikubwa, hususan baada ya mapinduzi ya kijeshi yaliyosababisha baadhi ya nchi kujiondoa kutoka Jumuiya ya ECOWAS. Hata hivyo, amesisitiza kuwa bila ushirikiano wa karibu, juhudi za kupambana na ugaidi hazitafanikiwa.
“Kwa mujibu wa Global Terrorism Index, mataifa matano kati ya kumi yanayoathiriwa zaidi na ugaidi yako katika ukanda wa Sahel. Eneo hili linachangia asilimia 19 ya mashambulizi ya kigaidi duniani — na zaidi ya nusu ya vifo vinavyohusiana na ugaidi. Vurugu na hali hii ya kutokuwa na utulivu vimesababisha mateso makubwa kwa mamilioni ya watu.”
Mataifa ya Sahel yako tayari kushirikiana na nchi jirani
Balozi wa Mali wa Umoja wa Mataifa, Issa Konfourou, amesema mataifa ya Sahel yako tayari kushirikiana na nchi jirani na washirika wa kimataifa kwa kuheshimu mamlaka ya kila taifa. Kwa upande wake Rais wa Kamisheni ya ECOWAS, Omar Alieu Touray, ameonya kuwa hali ya kutoaminiana imekuwa kikwazo kikubwa kwa juhudi za pamoja na hakuna kiasi cha fedha kitakachowasaidia kushinda ugaidi bila ushirikiano.
Kuanzia Januari hadi Novemba 2025, takribani matukio 450 ya kigaidi yalirekodiwa katika ukanda wa Sahel, na kusababisha vifo vya karibu watu 2,000. Ingawa Sahel ya Kati ilikuwa na takriban asilimia 80 ya matukio yote na zaidi ya asilimia 85 ya vifo, Afrika Magharibi kwa ujumla na hata bara lote la Afrika bado linabaki kuwa katika hatari kubwa ya ugaidi.”
Ukanda wa Sahel pia unakabiliwa na changamoto kubwa za kibinadamu na kiuchumi. Umoja wa Mataifa unakadiria kuwa unahitaji dola bilioni 4.9 kwa ajili ya misaada ya kibinadamu mwaka huu, lakini hadi sasa chini ya robo ya kiasi hicho imepatikana. Kwa sasa, mashambulizi yanaendelea kuenea katika maeneo mapya, huku makundi ya wapiganaji wa jihadi yakiongeza mbinu za kuathiri uchumi na kuzuia usambazaji wa rasilimali muhimu.