Serikali ya Russia imeyataka madola ya Magharibi kuachana na lugha ya vitisho na badala yake yatambue na kuikubali haki ya Iran ya kurutuubisha madini ya urani.
Akisisitiza haja ya nchi za Magharibi kurejea katika diplomasia, msemaji wa Wizara ya Mambo ya Nje ya Russia amezitaka nchi za Magharibi kuacha lugha ya vikwazo na vitisho na zikubali haki halali ya Iran ya kurutubisha madini ya urani kwa matumizi ya kiraia chini ya usimamizi wa kimataifa, kwa kuzingatia sheria za kimataifa.
Maria Zakharova, msemaji wa Wizara ya Mambo ya Nje ya Russia, amepongeza msimamo wa Iran katika mazungumzo hayo na kueleza kuwa, Tehran inahitaji dhamana thabiti ili miundombinu yake ya nyuklia isikabiliwe na mashambulizi zaidi ya makombora na milipuko ya mabomu, na kwamba matakwa ya Iran yamo ndani kabisa ya fremu ya diplomasia.
Vile vile amezichukulia hatua za Marekani na waitifaki wake kuwa ndio chanzo cha mgogoro katika Mkataba wa Kimataifa wa Kuzuia Uzalishaji na Uenezaji wa Nyuklia (NPT), huku Wakala wa Kimataifa wa Nishati ya Atomiki (IAEA) siku zote ukithibitisha kufungamana Iran na mkataba huo.
Zakharova amesisitiza kuwa Moscow imejitolea kutafuta utatuzi wa kisiasa na kidiplomasia. Aidha ameonya juu ya madhara ya uchochezi na chokochoko za kijeshi ambazo zinatishia utulivu katika eneo la Asia Magharibi na kuyataja mashambulizi ya kijeshi dhidi ya vituo vya nyuklia chini ya uangalizi wa Wakala wa Kimataifa wa Nishati ya Atomiki (IAEA) kuwa kamwe hayakubaliki.