Vyanzo hivyo vilivyozungumza kwa sharti la kutotajwa majina, vimesema kuwa Ukraine iko chini ya shinikizo kubwa kutoka Marekani kuliko wakati wowote wa mazungumzo ya awali ya amani, na kwamba nchi hiyo inaitaka Ukraine kusaini makubaliano ya mpango huo kufikia Alhamisi ijayo.
Vyanzo hivyo vimeongeza kusema Marekani na Urusi zinataka kusitisha vita lakini zinaitaka Ukraine kugharamia kufanikiwa kwa mchakato huo.
Marekani imewasilisha kwa Ukraine mpango wa vipengele 28, unaoidhinisha baadhi ya masharti makuu ya Urusi katika vita hivyo ikiwa ni pamoja na kwamba Kyiv iachie maeneo zaidi, kupunguza ukubwa wa jeshi lake na kuzuiwa kujiunga na jumuiya ya kujihami ya NATO.
Viongozi wa Ulaya wamhakikishia Zelensky kuiunga mkono Ukraine
Kansela wa Ujerumani Friedrich Merz, Rais wa Ufaransa Emmanuel Macron na Waziri Mkuu wa Uingereza Keir Starmer wamepongeza juhudi hizo za Marekani lakini wakamhakikishia Zelensky uungaji mkono usioyumba kwa Ukraine katika kutafuta amani ya kudumu na ya haki.
Zelensky aliwasiliana kwa njia ya simu na washirika wake hao wakuu wa Ulaya .
Katika taarifa baada ya mawasiliano hayo ya simu ya pande nne, Ujerumani ilisema kuwa viongozi hao walipongeza ahadi ya kuzingatia uhuru wa Ukraine na nia ya kuipa dhamana thabiti za usalama.
Merz, Macron, Starmer na Zelensky pia walikuwa na maoni sawa kwamba makubaliano yoyote yanayoathiri mataifa ya Ulaya, Umoja wa Ulaya, au NATO yanahitaji idhini ya washirika wa Ulaya au makubaliano kati ya washirika.
von der Leyen kufanya mashauriano kuhusu mpango wa amani wa Trump
Huku hayo yakijiri, Rais wa halmashauri kuu ya Umoja wa Ulaya Ursula von der Leyen, amesema leo kuwa atafanya mashauriano kuhusu mpango huo mpya wa amani unaolenga kumaliza vita nchini Ukraine.
Katika mkutano na waandishi wa habari mjini Johannesburg nchini Africa Kusini, amesema watajadili hali hiyo na viongozi wa Ulaya pamoja na viongozi wengine pembezoni mwa mkutano wa G20 utakaoanza kesho Jumamosi.
”Pia nitawasiliana na Rais Zelensky kuzungumzia suala hilo. Muhimu ni kanuni muhimu ambayo tumeshikilia kila wakati, na hiyo ni hakuna chochote kuhusu Ukraine bila Ukraine.”
Von der Leyen hakutoa maoni yake juu ya yaliyomo kwenye mpango huo. Kulingana na Rais wa Baraza la Umoja wa Ulaya António Costa, pendekezo hilo bado halijawasilishwa rasmi na Marekani kwa Umoja wa Ulaya.