Mwenyekiti na mwanzilishi wa jukwaa la katiba Tanzania, Deus Kibamba, alipozungumza katika ofisi za chama cha mawakili cha Tanganyika Law Society, amehimiza utashi wa kisiasa kutoka kwa mamlaka za kiutendaji.
Amesema ili kukaribisha sura ya umoja wa kitaifa na kufungua dirisha la maridhiano ni muhimu watuhumiwa wote waliofikishwa mahakamani kutokana na maandamano ya uchaguzi wakaondolewa mashtaka pamoja na kuandaa mazingira rafiki ya kisiasa kabla ya kuingia hatua nyingine.
Watuhumiwa wengi wanaendelea kushikiliwa
Wengi wa watuhumiwa wanaendelea kushikiliwa ikiwamo vijana licha ya Rais Samia Suluhu Hassan kutaka mamlaka zinazohusika na makosa kuangalia uwezekano wa kuzifutilia mbali kesi zote.
Akizungumza jijini Arusha baada ya kumaliza mashauriano mahakamani, wakili kutoka Kituo cha sheria na haki za binadamu, Hamis Mkini amesema miongoni makosa yanayowakabili watuhumiwa hao ni pamoja na uhaini.
Amesema miongoni mwa watuhumiwa hao ni pamoja na vijana walioko chini ya miaka 18 na ambao wengine walipaswa kuwa katika mitihani ya kuhitimu kidato cha nne inayoendelea na ambayo inamalizika wiki ijayo.
Vijana hao walikamatwa katika sako mkali ulioendeshwa na jeshi la polisi kufuatia maandamano makubwa yaliyofanywa wakati na baada ya uchaguzi mkuu ambao umeendelea kukibakiza chama tawala CCM Madarakani.
Hivi karibuni Rais Samia Suluhu Hassan alitaka mamlaka zinazohusika na makosa ikiwemo ofisi ya Mkurugenzi wa Mashtaka (DPP) kuwaachia mara moja watuhumiwa hao.