Ripoti hiyo kwa jina Maeneo Hatari kwa Njaa: Onyo la Mapema Kuhusu Ukosefu Mkubwa wa Chakula, inayopima hali ya utoshelevu wa chakula kati ya Novemba 2025 na Mei 2026, inaonyesha kuwa Kenya imeorodheshwa tena miongoni mwa maeneo hatari kwa njaa kwa mara ya kwanza tangu 2024.
Uhalisia huu unakinzana moja kwa moja na matamshi ya Rais William Ruto ambaye majuzi alitangaza kwamba nchi ipo na chakula cha kutosha na kwamba serikali imefanikiwa kuimarisha hali.
Ripoti hiyo inaonyesha kuwa hali hii inaendeshwa na utabiri mbaya wa mvua, bei za juu za vyakula, kuongezeka kwa migogoro ya kugombania rasilimali chache na kupungua kwa ufadhili wa kibinadamu, vitu vinavyoweza kuwaacha mamilioni ya watu katika hatari kubwa. Teso Guyo ni mkazi wa Horr Kaskazini mwa Kenya, kwa siku ya pili familia yake haijapata chakula cha kutosha.
“Kama nina pesa naweza nikanunua maziwa kwa mtoto, nikanunua chakula kizuri ninachotaka kwa mtoto, wakati uliopita Shirika la Msalaba Mwekundu lilitusaidia.”
Hali ya hewa inaonyesha uwezekano wa kupata mvua za chini
Takribani watu 160,000, wengi wao wakitokea maeneo ya Pembe ya Afrika mashariki, Nairobi na sehemu za Bonde la Ufa, wanatarajiwa kuathiriwa kwa mujibu wa ripoti hiyo. Viwango vya utapiamlo vinaongezeka, ambapo watoto 742,000 walio chini ya miaka mitano wanatarajiwa kuwa na utapiamlo mkali kati ya Aprili 2025 na Machi 2026, wakiwemo 179,000 walio na utapiamlo sugu.
Zaidi ya kina mama wajawazito na wanaonyonyesha 109,000 wanahitaji msaada wa lishe, ongezeko la asilimia 22 la watu walio katika hatari kubwa ya njaa. Chulo Kedubo ni mkazi wa Horr Kaskazini, anaelezea kadhia ya Kijiji kizima.
“Watu wameumia, wamama na watoto, wazee wameumia, wengine ni walemavu kwa kweli wameumia sana.”
Ripoti inaendelea kuelezea kuwa miundo ya hali ya hewa inaonyesha uwezekano mkubwa wa kupata mvua za chini ya wastani kati ya Oktoba na Desemba 2025, hasa maeneo ya mashariki mwa Kenya. Zaidi ya changamoto za hali ya hewa na kiuchumi, Kenya inakabiliwa na migogoro inayochangiwa na uhaba wa rasilimali asili.
Jamii za wafugaji kaskazini na kaskazini mashariki zinashuhudia ongezeko la migogoro kuhusu maji, maeneo ya malisho na njia za uhamaji.
Vilevile, migongano ya binadamu na wanyamapori katika Laikipia, Samburu na Taita Taveta inaathiri upatikanaji wa ardhi na malisho. Kwa pamoja, changamoto hizi zinaongeza hatari ya vurugu na kuhama makazi, mambo ambayo yanazidi kudhoofisha usalama wa chakula.