Jeshi la Walinzi wa Mapinduzi ya Kiislamu la Iran (IRGC) limesema kuwa mauaji ya kikatili yaliyofanywa na Israel dhidi ya kamanda wa ngazi za juu wa Harakati ya Hizbullah ya Lebanon yamefichua “udhaifu” wa utawala huo mbele ya Mhili wa Muqawama.
Katika taarifa iliyotolewa Jumatatu, IRGC imelaani vikali mauaji ya Haytham Ali Tabatabai katika vitongoji vya kusini mwa mji mkuu wa Lebanon, Beirut, yaliyofanyika siku iliyotangulia.
Taarifa hiyo imesema:“Utawala wa Kizayuni kwa mara nyingine tena umetenda kosa la wazi la kigaidi kwa kumlenga mmoja wa makamanda imara wa Hizbullah.”
“Kitendo hiki cha woga, kilichotokea wakati wa kile kinachodaiwa kuwa ni usitishaji vita ambao Waisraeli wamekuwa wakiuvunja mara kwa mara, si ishara ya nguvu bali kinaonesha udhaifu na kutokuwa na uwezo adui mbele ya azma ya mataifa ya eneo hili pamoja na Mhimili wa Muqwama.”
IRGC pia imebaini masikitiko yake juu ya ukimya na kutochukua hatua kwa mashirika ya kimataifa na ya haki za binadamu kuhusu mauaji ya kimbari na hujuma zinazofanywa na Israel, pamoja na uungwaji mkono ambao utawala huo unapata kutoka kwa watawala wa Marekani wanaochochea vita na kuendeleza ugaidi.
Aidha IRGC imesisitiza kuwa Mhili wa Muqawama bado “uko hai na una nguvu” na kwamba damu ya mashahidi itawasha moto wa matumaini na msimamo imara katika nyoyo za wanaotafuta uhuru pamoja na wapiganaji waaminifu wa upinzani kote eneo hili.
Halikadhalika IRGC imesema: “Bila shaka, Mhili wa Muqawama na Hizbullah ya Lebanon wana haki kamili ya kulipiza kisasi kwa damu ya wapiganaji hodari wa Uislamu. Muda utakapowadia, jibu kali na la kuumiza litatolewa dhidi ya mvamizi huyo wa kigaidi.”
Jumapili usiku, Hizbullah ilitangaza kuuawa shahidi kwa Kamanda Tabatabai pamoja na wapiganaji wengine wanne wa Hizbllah katika shambulio la kigaidi la utawala wa Israel.
Tabatabai alikuwa kamanda wa ngazi ya juu zaidi wa Hizbullah kuuawa na Israel tangu kusitishwa kwa mapigano kulikofikiwa Novemba 2024 kati ya Israel na kundi hilo la upinzani.
Katika taarifa hiyo hiyo, IRGC ilisema Umma wa Kiislamu unayaona mauaji hayo kama sehemu ya “vita vya kisaikolojia” vya Israel na “jaribio la mwisho la kukata tamaa” kuficha migogoro yake ya ndani pamoja na kushindwa kwake mara kwa mara katika medani ya vita. IRGC imeonya kwamba matendo kama hayo yataleta kushindwa kukubwa zaidi na kuongezeka kwa hasira na chuki ya dunia dhidi ya utawala huo ghasibu.
Taarifa hiyo imehitimisha kwa kusema: “Mhili wa Muqawama, kupitia juhudi za kijeshi, kisiasa, vyombo vya habari pamoja na uungwaji mkono wa wananchi, utaendelea kupambana hadi kupata ushindi wa mwisho dhidi ya wavamizi wa ardhi takatifu ya Palestina na Al-Quds (Jerusalem).”