Kamanda wa waasi wa Vikosi vya Msaada wa Haraka (RSF), Mohamed Hamdan Dagalo “Hemedti”, ametangaza kusitisha mapigano ya ndani kwa kipindi cha miezi mitatu kwa “sababu za kibinadamu”, ambako kunajumuisha kusitishwa uhasama; siku moja baada ya mkuu wa Baraza la Mpito la Sudan, Abdel Fattah al-Burhan, kukaaataa pendekezo la Marekani kwa ajili ya kusitisha mapigano.
Katika taarifa iliyorekodiwa, Mohamed Hamdan Dagalo amesema, “Kwa ajili ya kwenda sambamba na juhudi za kimataifa, ubunifu wa Kamati ya Pande Nne, Umoja wa Afrika na IGAD, tunatangaza usitishaji vita kwa sababu za kibinadamu ambao unajumuisha kukomesha uhasama kwa miezi mitatu, na kukubaliana kuanzishwa utaratibu wa ufuatiliaji wa kimataifa.”
Jenerali Dagalo pia ametangaza “kuanzishwa utaratibu wa ufuatiliaji wa uwanjani kwa ajili ya usitishaji mapigano, unaosimamiwa na nchi za Kamati ya Pande Nne, Umoja wa Afrika na IGAD, ili kuhakikisha utekelezaji wake na utoaji salama wa misaada ya kibinadamu kwa wale wanaohitaji.”
Awali, Mkuu wa Baraza la Utawala wa Mpito nchini Sudan, Abdel Fattah al-BurhanAbdel Fattah al-Burhan alikuwa ametangaza kwamba “hakuna pingamizi la kusitishwa mapigano, iwapo wanamgambo waasi wataondoka katika maeneo waliyoyavamia baada ya makubaliano ya Jeddah.”
Abdel Fattah al-Burhan, pia amekataa pendekezo lililowasilishwa na mshauri wa Rais wa Marekani kuhusu masuala ya Kiarabu na Afrika, Massad Boulos, juu ya utatuzi wa mgogoro wa Sudan akilitaja pendekezo hilo kuwa ndilo “baya zaidi kuwahi kuwasilishwa”. Amesema kwamba “ikiwa Boulos anataka suluhu, anapaswa kurejea kwenye ramani ya njia iliyowasilishwa na Baraza Kuu la Utawala.” Pia ameitaja Kamati ya Pande Nne iliyopewa jukumu la kumaliza vita vya ndani nchini Sudan kuwa ni ya “upendeleo.”
Huko Darfur Kaskazini na Kordofan Magharibi kunaendelea kushuhudia wimbi jipya ya watu kukimbia makazi yao huku operesheni za kijeshi zikizidi kupamba moto. Katika mji wa Tawila pekee katika jimbo la Darfur Kaskazini, idadi ya watu waliohama makakzi yao imeongezeka hadi zaidi ya 600,000, kwa mujibu wa takwimu za Umoja wa Mataifa.