Viongozi wa nchi za Umoja wa Ulaya na Umoja wa Afrika wameahidi kuimarisha ushirikiano wa kiuchumi, biashara na kukabiliana na changamoto za uhamiaji usio wa lazima, ili kufungua milango ya fursa zaidi kati yao. Hayo yamebainishwa Jumanne mwishoni mwa mkutano wa kilele wa siku mbili wa viongozi hao uliofanyika mjini Luanda, nchini Angola.
Tamko la viongozi hao kwa pamoja limetolewa baada ya mazungumzo yaliyotoa msisitizo wa umuhimu wa kuendeleza minyororo ya thamani barani Afrika, huku Ulaya ikiwa na mpango wa kutafuta madini, nishati na masuala ya kidijitali, na Afrika ikilenga suala la ajira na ukuaji wa uchumi.
Rais wa Baraza Kuu la Umoja wa Ulaya,Antonio Costa, amesisitiza kuwa Afrika ina utajiri mkubwa wa rasilimali asilia zinazohitajika kwenye sekta ya nishati na teknolojia, lakini akabainisha kuwa rasilimali watu na vijana ndio hazina kubwa zaidi.
Costa pia amesema suala la vita ni moja ya jambo linalohitaji mUkraineakubaliano na kuwekewa msisitizo.
“Tunasisitiza tena juu ya suala la amani na haki ya kudumu nchini Ukraine, katika maeneo ya Palestina yanayokaliwa kwa mabavu, Sudan, Sudan Kusini, Jamhuri ya Kidemokrasia ya Kongo, Sahel, Somalia na katika maeneo mengine yenye migogoro duniani.”
Mabadiliko ya Tabianchi
Tamko hilo la pamoja pia limegusia ahadi zilizopita kuhusu ufadhili wa mabadiliko ya tabianchi na kukuza nishati mbadala barani Afrika. Brussels imeweka matumaini makubwa kwenye mpango wa Umoja wa Ulaya wa kuwekeza katika miundombinu endelevu duniani, hasa barani Afrika.
Hata hivyo, mkutano huo ulipata changamoto kadhaa ikiwemo ya baadhi ya viongozi wa Ulaya kuondoka mapema na wengine kushindwa kuhudhuria. Wachambuzi wamesema ingawa kulikuwa na kauli nyingi za ushirikiano, msisitizo wa Ulaya kwa mgogoro wa Ukraine ulionyesha kuwa Afrika bado si kipaumbele.
Tamko la mwisho la mkutano wa Luanda limeweka msisitizo kwa demokrasia, utawala bora, haki za binadamu na uhuru wa vyombo vya habari, ingawa halikutaja moja kwa moja ukiukaji wa haki unaoripotiwa katika baadhi ya nchi. Kwa ujumla, mkutano huu uliashiria hatua mpya ya ushirikiano wa Umoja wa Ulaya na Umoja wa Afrika, huku changamoto za kisiasa, kiuchumi na kijamii zikibaki kuwa kikwazo cha utekelezaji wa malengo yaliyowekwa.